హైదరాబాద్, వెలుగు : కాంగ్రెస్ పార్టీ అభ్యర్థుల మూడో లిస్ట్ రిలీజ్ అయింది. 16 మంది పేర్లతో సోమవారం రాత్రి ఈ జాబితాను విడుదల చేసింది. గత లిస్టుల్లో ప్రకటించిన వనపర్తి, బోథ్ స్థానాలకు అభ్యర్థులను మారుస్తూ కొత్తవారితో ఆ స్థానాలను కూడా ఈ లిస్టులో చేర్చింది. కామారెడ్డిలో కేసీఆర్పై పోటీకి పీసీసీ చీఫ్ రేవంత్రెడ్డి పేరును థర్డ్ లిస్టులో ఖరారు చేసింది. అటు కొడంగల్తోపాటు ఇక కామారెడ్డిలోనూ రేవంత్ పోటీ చేయనున్నారు. చెన్నూరు స్థానాన్ని మాజీ ఎంపీ వివేక్ వెంకటస్వామికి కాంగ్రెస్ పార్టీ కేటాయించింది.
నిజామాబాద్ అర్బన్ స్థానాన్ని షబ్బీర్ అలీకి, పటాన్చెరు టికెట్ను నీలం మధుకు ఓకే చేసింది. మొదటి రెండు జాబితాల్లో 100 సీట్లకు అభ్యర్థులను ప్రకటించగా.. అందులో రెండు సీట్లను మారుస్తూ 16 మందితో ఈ మూడో జాబితాను కాంగ్రెస్ రిలీజ్ చేసింది. దీంతో ఇప్పటివరకు 114 సీట్లకు కాంగ్రెస్ అభ్యర్థులు ఖరారయ్యారు. రాష్ట్రంలో మొత్తం 119 అసెంబ్లీ స్థానాలు ఉండగా, కొత్తగూడెం సీటును సీపీఐకి కేటాయించిన కాంగ్రెస్ హైకమాండ్.. మరో నాలుగు సీట్లను పెండింగ్లో పెట్టింది. ఇందులో మిర్యాలగూడ, సూర్యాపేట, తుంగతుర్తి, చార్మినార్ ఉన్నాయి. పెండింగ్ స్థానాలకు మంగళవారం అభ్యర్థులను ఖరారు చేసే అవకాశం ఉందని పార్టీ వర్గాలు చెప్తున్నాయి.
బోథ్, వనపర్తిలో మార్పు
గత జాబితాల్లో బోథ్ స్థానాన్ని వెన్నెల అశోక్కు, వనపర్తి స్థానాన్ని చిన్నారెడ్డికి కేటాయించిన కాంగ్రెస్.. వాటిలో అభ్యర్థులను మార్చింది. బోథ్ను ఆడే గజేందర్కు, వనపర్తిని తూడి మేఘా రెడ్డికి ఇస్తూ మూడో లిస్టులో వారి పేర్లు చేర్చింది.
ముగ్గురు బీసీలకు
మూడో లిస్ట్లో ముగ్గురు బీసీలకు కాంగ్రెస్ పార్టీ సీట్లు ఇచ్చింది. కరీంనగర్, నారాయణఖేడ్, పటాన్చెరు స్థానాలను బీసీలకు ఇచ్చింది. కామారెడ్డి నుంచి రేవంత్ రెడ్డి పోటీ చేస్తుండడంతో.. ఆ స్థానానికి అప్లై చేసుకున్న షబ్బీర్ అలీకి నిజామాబాద్ అర్బన్ టికెట్ను కేటాయించింది. ఇటీవల పార్టీలో చేరిన ఏనుగు రవీందర్ రెడ్డికి బాన్సువాడ, నీలం మధు ముదిరాజ్కు పటాన్చెరు టికెట్లను కన్ఫామ్ చేసింది. పొంగులేటి శ్రీనివాస్ రెడ్డి అనుచరుడు కోరం కనకయ్యకు ఇల్లందు టికెట్ దక్కింది. సత్తుపల్లి టికెట్ కోసం ఓయూ జేఏసీ నేత మానవతారాయ్ అప్లై చేసుకున్నా ఆయనకు దక్కలేదు. డాక్టర్ మట్టా రాగమయికి ఈ టికెట్ కేటాయించారు.
