భూపాలపల్లి అర్బన్, వెలుగు: ఈ ఆర్థిక సంవత్సరంలో ప్రాధాన్యత రంగాలకు రూ.2,971.20 కోట్ల రుణాలకు గాను ఇప్పటివరకు రూ.1,937.21 కోట్ల రుణాలు ఇచ్చామని కలెక్టర్ రాహుల్ శర్మ తెలిపారు. గురువారం ఐడీవోసీ కార్యాలయంలో లీడ్ బ్యాంక్ ఆధ్వర్యంలో జిల్లా కన్సల్టేటివ్, రివ్యూ కమిటీ , ఇంప్లిమెంటేషన్ కమిటీ సమావేశం నిర్వహించారు.
ఈ సందర్భంగా ఆయన మాట్లాడుతూ.. నిర్దేశించిన లక్ష్యాల మేరకు రుణాలు మంజూరు చేయాలని బ్యాంకర్లకు సూచించారు. మున్సిపల్, గ్రామ పంచాయతీ పరిధిలో పని చేస్తున్న పారిశుధ్య కార్మికులకు ఇన్సూరెన్స్ సౌకర్యం కల్పించేందుకు కార్యాచరణ రూపొందించాలని చెప్పారు. ఎమ్మెల్యే సత్యనారాయరావు, మున్సిపల్ చైర్పర్సన్ బుర్ర కొమురయ్య, ఆర్బీఐ ఎల్డీవో యశ్వంత్ సాయి, నాబార్డ్ డీడీఎం చంద్రశేఖర్ తదితరులు పాల్గొన్నారు.
