- ఎక్స్‌గ్రేషియా కోసం సీఎం వద్దకు
- స్పందించకుంటే సమ్మె చేయాలని కార్మిక సంఘాల నిర్ణయం
మందమర్రి, వెలుగు: సింగరేణి బొగ్గు గని ప్రమాదంలో మరణించిన కార్మికుల కుటుంబాలకు రూ.కోటి చొప్పున పరిహారం చెల్లించాలనే డిమాండ్తో సీఎం కేసీఆర్ను కలవాలని కార్మిక సంఘాలు బుధవారం రాత్రి నిర్ణయించాయి. టీబీజీకేఎస్, ఏఐటీయూసీ, బీఎంఎస్, హెచ్ఎంఎస్, సీఐటీయూ, ఐఎన్టీయూసీ, ఇప్టూ, టీఎన్టీయూసీ సంఘాల లీడర్లు సమావేశమై చర్చించారు. టీబీజీకేఎస్నాయకత్వంలో ప్రజాప్రతినిధుల ద్వారా సీఎంను కలవాలని, ఆయన నుంచి సానుకూల స్పందన రాకుంటే సమ్మె చేయాలని సంఘాలన్నీ నిర్ణయించాయి. ఈ నెల 17న సింగరేణి యాజమాన్యానికి సమ్మె నోటీసు ఇవ్వాలని తీర్మానం చేశారు.
సింగరేణిలో బుధవారం ఘోరం జరిగింది. మంచిర్యాల జిల్లా శ్రీరాంపూర్ఏరియాలోని ఎస్సార్పీ 3 బొగ్గు గనిలో పై కప్పు కూలి నలుగురు కార్మికులు చనిపోయారు. గనిలో సీమ్ జంక్షన్ నుంచి 15 మీటర్ల దూరంలోని వర్క్ ప్లేస్ దగ్గర భారీ పై కప్పు (బొగ్గు బండ) బుధవారం ఒక్కసారిగా కూలింది. దాంతో టింబర్ మెన్ బేర లచ్చయ్య(61), వి.కృష్ణారెడ్డి(58), బదిలీ వర్కర్లు గడ్డం సత్యనర్సింహరాజు(32), రెంక చంద్రశేఖర్(32) అక్కడికక్కడే మరణించారు. పై కప్పు వారం రోజుల నుంచే ప్రమాదకరంగా మారిందని చెబుతున్నారు. దాన్ని సరి చేసేందుకు ఉదయం షిఫ్టులో నలుగురు కార్మికులు లోపలికి వెళ్లారు. పై కప్పు కూలకుండా రోప్, దాట్లు, ఐరన్ మెష్ బిగించే పనులు చేపట్టారు. వారు డ్యూటీకెక్కిన మూడు గంటల్లోనే ప్రమాదం జరిగింది.
