ఈ మధ్య కాలంలో ఎక్కువ బరువు పెద్ద తలనొప్పిగా మారింది. బరువుని కంట్రోల్ చేయడానికి ఎన్ని ప్రయత్నాలు చేసినా కొందరు ఫెయిల్ అవుతూనే ఉన్నారు. మరికొందరైతే తినడానికి కూడా భయపడుతున్నారు . జిమ్లో గంటలు గంటలు ఉంటున్న వాళ్లూ లేకపోలేదు. ఇక పై ఆ కష్టాలకు చెక్. ఐస్బాత్తో బరువు తగ్గించుకోవచ్చు అంటున్నారు పరిశోధకులు. చలికాలంలో కాస్త కష్టమే అయినా… బరువు తగ్గుతారు కదా ఒకసారి ట్రై చేయండి.
ఐస్బాత్ బరువు తగ్గడానికి సాయం చేస్తుంది. కండరాలను కూడా దృఢంగా మారుస్తుంది. అదేంటి? ఐస్బాత్కి.. అధిక బరువు, కండరాల దృఢత్వానికి సంబంధం ఏంటి? ఇదెలా సాధ్యం అనుకుంటున్నారా? అయితే ఇది చదవాల్సిందే.
ఎన్ని లాభాలో
వ్యాయామం అనగానే మొదట అందరికీ గుర్తొచ్చేది జిమ్. శరీరాన్ని ఫిట్గా ఉంచడం జిమ్లో ఎక్సర్సైజ్ చేస్తేనే సాధ్యమవుతుందని చాలామంది అనుకుంటారు. కానీ శరీరాన్ని హెల్దీగా , ఫిట్గా ఉంచడానికి జిమ్, వాకింగ్ తో పాటు ఐస్బాత్ కూడా సాయపడుతుంది అంటున్నారు యూనివర్సిటీ ఆఫ్ మాస్ట్రిచ్ ప్రొఫెసర్స్. బరువు తగ్గడానికి, చర్మం బిగుతుగా మారడానికి , కండరాలు బలంగా అవడానికి ఐస్బాత్ సాయం చేస్తుందని నిరూపించారు కూడా.
బరువు తగ్గుతారా!
ఐస్బాత్తో కొవ్వు కరిగించొచ్చా లేదా అని చాలా ఏళ్ల నుంచి పరిశోధనలు జరుగుతున్నాయ్. 2000 సంవత్సరంలో ‘ఐస్ థెరపీ’ పేరుతో బరువు ఎక్కువగా ఉన్న, చర్మం సాగినట్టుగా ఉన్న ప్రాంతాల్లో ఐస్క్యూబ్స్తో మృదువుగా మసాజ్ చేసేవాళ్లు. మసాజ్ వల్ల సాగినట్టుగా ఉండే చర్మం సాధారణ స్థితికి వచ్చి శరీరంలో రక్త ప్రసరణ కూడా మెరుగుపడేది. కానీ ఇదెలా సాధ్యమైందనే విషయంపై ఖచ్చితమైన వివరణ లేదు. దాంతో 2014లో గర్వన్ ఇనిస్టిట్యూట్ ఆఫ్ మెడికల్ రీసెర్చ్ ఈ విషయంపై పరిశోధన చేసింది. పూర్తిగా తెలియకపోయినా 90 శాతం మంది బరువు తగ్గుతున్నారని అందులో తేలింది. దాన్ని ఆధారం చేసుకుని యూనివర్సిటీ ఆఫ్ మాస్ట్రిట్చ్ ప్రొఫెసర్ డాక్టర్ జొనంతన్ ఎం. పీకే బృందం స్టడీ చేపట్టింది. ఇందులో బరువు తగ్గడంతో పాటు కండరాలు కూడా దృఢంగా తయారవుతాయని వెల్లడైంది.
ఎలా సాధ్యం
మనిషి శరీరంలో బ్రౌన్, వైట్ కలర్స్లో రెండు రకాల కొవ్వు కణజాలాలు ఉంటాయి. వాటిల్లో తెలుపు రంగు కణజాలం శక్తిని నిల్వ చేసి ఛాతి, తొడ భాగాలకు పంపించి బరువు పెరిగేలా చేస్తుంది. బ్రౌన్ రంగు కొవ్వు కణజాలం మెడ భాగంలో ఉండి తెల్ల కొవ్వు కణజాలం పనికి ఆటంకం కలిగిస్తుంటుంది. ఐస్క్యూబ్ లేదా నీళ్లతో స్నానం చేయడం వల్ల బ్రౌన్ కణజాలం పని వేగవంతం అవుతుంది. ఈ బాత్ వల్ల బ్రౌన్ కణజాలం ఐరిష్, ఎఫ్జిఎఫ్21 లనే రెండు హార్మోన్లు విడుదల చేసి తెల్ల కణజాలాన్ని వేగంగా కరిగిస్తుంది. ప్రతిరోజు 10 నుంచి పదిహేను నిమిషాల పాటు ఐస్బాత్ చేస్తే 50 గ్రాముల తెలుపు రంగు కణజాలం అంటే 300 కిలో కెలొరీల ఎనర్జీ కరుగుతుంది. దాంతో బరువు సమస్య నుంచి తేలికగా బయటపడొచ్చు. అంతేకాదు ఐస్బాత్ వల్ల రిలీజ్ అయిన ఐరిష్, తెల్ల కణజాలాన్ని బ్రౌన్ కణజాలంగా మార్చేస్తుంది. అలా మార్చడం వల్ల డయాబెటిస్, కొలెస్ట్రాల్ సమస్యల నుంచి బయటపడొచ్చు.
కండరాలు బలంగా…
ఐస్బాత్ వల్ల కేవలం బరువే కాదు కండరాలు కూడా బలంగా మారతాయి అంటున్నారు పరిశోధకులు. 21 సంవత్సరాలున్న 12 మంది యువకులు పాల్గొన్న ఈ స్టడీలో. మొదట వాళ్లతో రెండు వారాల పాటు లెగ్ ఎక్సర్సైజ్లు చేయించారు. తర్వాత ఆ కాళ్లలో ఒకదాన్ని ఐస్నీళ్లలో, మరొకదాన్ని మామూలు నీళ్లలో ఇరవై నిమిషాలు ఉంచి బయటకు తీశారు. రెండు కాళ్ల ప్రొటీన్ శాంపిల్స్ తీసి టెస్ట్ చేస్తే ఎక్సర్సైజ్ తర్వాత ఐస్బాత్లో పెట్టిన కాలు ఆరోగ్యంగా, బలంగా ఉందని తేలింది.
లెక్క ఉంది
ఐస్బాత్తో లాభాలే కాదు కొన్ని ఇబ్బందులూ లేకపోలేదు. ఐస్క్యూబ్స్ మధ్య అంతసేపు ఉంటే జలుబు వంటి సమస్యలొచ్చే అవకాశాలు ఎక్కువగా ఉంటాయి. గుండెనాళ సమస్యలు, హై బీపీ, టైప్1 , టైప్ 2 డయాబెటిస్ ఉన్నవాళ్లు కూడా ఐస్బాత్కి దూరంగా ఉండాలి.
ఇలా చేయాలి
ఐస్క్యూబ్స్తో బాత్ చేసేటప్పుడు సరైన పద్ధతిలో చేయకపోతే లేనిపోని సమస్యలొచ్చే అవకాశాలే ఎక్కువని సర్వేలో తేలింది. బరువు తొందరగా తగ్గాలని పావుగంట కన్నా ఎక్కువసేపు ఈ స్నానం చేయడానికి వీల్లేదు. అలాగే ఐస్బాత్ టెంపరేచర్ 10 నుంచి 15 డిగ్రీల సెల్సియస్ మాత్రమే ఉండాలి. అంతకన్నా ఎక్కువగా ఉంటే గోరువెచ్చని నీళ్లని కలపాలి. ఒకేసారి శరీరాన్ని ఐస్నీళ్లలో తడపకుండా మొదట కాలివేళ్లు, కాళ్లు పెట్టి ఆ టెంపరేచర్ని అవి తట్టుకోగలిగితే శరీరమంతా తడపాలి. ఐస్బాత్ మంచి ఫలితాన్ని చూపించాలంటే ఉదయం వర్కవుట్ తర్వాత చేయడం బెస్ట్.
