టీ20 వరల్డ్ కప్ నుంచి వెస్టిండీస్ నిష్క్రమించింది. సూపర్ 12కు వెళ్లాలంటే తప్పక గెలవాల్సిన మ్యాచ్ లో విండీస్ పసికూన ఐర్లాండ్ చేతిలో ఓడి..ఇంటిదారి పట్టింది. ఏకపక్షంగా సాగిన మ్యాచ్ లో ఐర్లాండ్ 9 వికెట్ల తేడాతో విజయం సాధించి..సూపర్ 12కు దూసుకెళ్లింది.
విండీస్ విఫలం..
ముందుగా టాస్ గెలిచి బ్యాటింగ్ చేసిన వెస్టిండీస్...20 ఓవర్లలో 5 వికెట్లకు 146 పరుగులే చేసింది. వెస్టిండీస్ ఆటగాళ్లలో బ్రాండన్ కింగ్ 48 బంతుల్లో ఒక సిక్స్, 6 ఫోర్లతో 62 పరుగులు చేయగా...ఓపెనర్ జన్సన్ చార్లెస్ 18 బంతుల్లో సిక్స్, 3 ఫోర్లతో 24 పరుగులు కొట్టాడు. చివరల్లో ఒడియన్ స్మిత్ 12 బంతుల్లో 19 పరుగులు చేశాడు. మిగతా వారు తక్కువ స్కోర్లకే పెవీలియన్ చేరారు. ఐర్లాండ్ బౌలర్లలో గారెత్ డెలానీ 3 వికెట్లు పడగొట్టాడు. సిమి సింగ్, బారీ మెక్‌కార్తీ ఒక్కో వికెట్ తీశారు.
సూపర్ స్టిర్లింగ్..
147 పరుగుల టార్గెట్తో బరిలోకి దిగిన ఐర్లాండ్..17 ఓవర్లలో కేవలం 1 వికెట్ కోల్పోయి లక్ష్యాన్ని ఛేదించింది. ఓపెనర్ పాల్ స్టిర్లింగ్ 48 బంతుల్లో 2 సిక్సులు, 6 ఫోర్లతో 66 పరుగులు చేసి జట్టును విజయతీరాలకు చేర్చాడు. అతనికి వికెట్ కీపర్ లోర్కాన్ టక్కర్ 35 బంతుల్లో 2 సిక్సులు, 2 ఫోర్లతో 44 పరుగులు చేసి సహకరించాడు. వీరికి తోడు..కెప్టెన్ ఆండ్రూ బల్బిర్నీ 23 బంతుల్లో 3 సిక్స్ లు, 3 ఫోర్లతో 37 పరుగులు చేశాడు. అకెల్ హుస్సేన్ ఒక వికెట్ పడగొట్టాడు.
విండీస్ ఇంటికి..ఐర్లాండ్ సూపర్ 12కు...
టీ20 వరల్డ్ కప్ గ్రూప్ దశలో భాగంగా..గ్రూప్ ఏ నుంచి..ఇప్పటికే శ్రీలంక, నెదర్లాండ్స్ సూపర్ 12కు వెళ్లాయి. ఇక గ్రూప్ బీ నుంచి..విండీస్పై గెలిచిన ఐర్లాండ్ సూపర్ 12కు చేరుకుంది. స్కాట్లాండ్, జింబాబ్వే మధ్య జరుగుతున్న మ్యాచ్లో ఏ జట్టు గెలుస్తుందో..ఆ జట్టు సూపర్ 12కు వెళ్తుంది.
