రజనీకాంత్-నాగార్జున నటించిన రీసెంట్ యాక్షన్ క్రైమ్ థ్రిల్లర్ ‘కూలీ’. లోకేష్ కనగరాజ్ తెరకెక్కించిన ఈ మూవీ ఆగస్టు 14న విడుదలై మిక్సెడ్ టాక్ తెచ్చుకుంది. అయినప్పటికీ పలు రికార్డులను నెలకొల్పి రూ.500 కోట్ల క్లబ్లో చేరింది. ఇపుడు ఈ మూవీ థియేటర్ లాంగ్ రన్ కంప్లీట్ చేసుకుని త్వరలో ఓటీటీలోకి అడుగుపెట్టడానికి సిద్ధమైంది.
‘కూలీ’ ఓటీటీ:
‘కూలీ’ ఓటీటీ హక్కులను ప్రైమ్ వీడియో దక్కించుకున్న విషయం తెలిసిందే. దాదాపు రూ.120 కోట్లు పెట్టి ప్రైమ్ వీడియో సొంతం చేసుకున్నట్లు సమాచారం. అయితే, ప్రైమ్ వీడియో, కూలీ మేకర్స్తో మాట్లాడుకున్న డేట్కి ముందే స్ట్రీమింగ్కి తీసుకొచ్చేలా ప్రయత్నం జరుగుతుంది. ఈ క్రమంలో సెప్టెంబర్ 11 నుంచి కూలీ సినిమాను స్ట్రీమింగ్ చేయనున్నట్లు ఓటీటీప్లే రిపోర్టు వెల్లడించింది. త్వరలోనే ఈ విషయంపై మేకర్స్ నుంచి అధికారిక ప్రకటన వచ్చే అవకాశం ఉంది.
‘కూలీ’ బాక్సాఫీస్:
ఆగస్టు 14న విడుదలైన ‘కూలీ’ మూవీ బాక్సాఫీస్ వద్ద మంచి వసూళ్లే సాధించింది. విడుదలైన 19 రోజుల్లో ప్రపంచవ్యాప్తంగా రూ.507 కోట్లకి పైగా గ్రాస్ కలెక్షన్స్ సాధించింది. ఇండియాలో రూ.281 కోట్ల నెట్ వసూలు చేసింది.
ఇక రాష్ట్రాల వారీగా వసూళ్లు చూస్తే.. సొంత భాష తమిళంలోనే అత్యధికంగా రూ.180 కోట్లు కలెక్ట్ చేసింది. ఆ తర్వాత తెలుగులో రూ.60 కోట్లు చేయగా, హిందీలో రూ.36 కోట్లు, కన్నడలో రూ.2.92 కోట్ల వసూళ్ళు సాధించింది. ఇకపోతే 20వ రోజైన నిన్న మంగళవారం సైతం ఇండియాలో రూ.1.3 కోట్ల నెట్ సాధించింది.
తలైవా రూ.500 కోట్ల క్లబ్:
రజనీకాంత్ ఖాతాలో రూ.500 కోట్లు సాధించిన చిత్రాల్లో కూలీ మూడవ చిత్రంగా నిలిచింది. గతంలో రోబో 2.0, జైలర్ సినిమాలు ఈ ఫీట్ సాధించాయి. ఈ క్రమంలో రజినీ ఖాతాలో మూడు 500 కోట్ల మార్క్ సినిమాలను సాధించి తలైవా తన పవర్ చూపించారు. అంతేకాకుండా.. మూడు 500 కోట్ల సినిమాలను అందించిన ఏకైక తమిళ హీరోగా రజినీకాంత్ నిలిచారు.
