- యూపీలో అత్తామామ సజీవ దహనం
న్యూఢిల్లీ: వరకట్న వేధింపుల కారణంగా ఓ మహిళ బలవన్మరణానికి పాల్పడింది. అది తెలిసి ఆమె తల్లిదండ్రులు.. అత్తామామల ఇంటికి నిప్పు పెట్టారు. దీంతో ఆమె అత్త, మామ ప్రాణాలు కోల్పోయారు. సోమవారం రాత్రి ఉత్తరప్రదేశ్లోని ప్రయాగ్రాజ్లో ఈ ఘటన జరిగింది. సిటీలోని ఝల్వా ప్రాంతానికి చెందిన అన్షిక కేసర్వాణికి కిందటేడాది ఫిబ్రవరిలో అదే ప్రాంతానికి చెందిన అన్షు అనే వ్యాపారితో పెండ్లయింది.
ఆమె సోమవారం సాయంత్రం ఇంట్లో ఉరేసుకుని చనిపోయింది. ఈ విషయం తెలిసి అన్షు ఇంటికి చేరుకున్న ఆమె తల్లిదండ్రులు.. అదనపు కట్నం కోసం వేధించడం వల్లే అన్షిక ఆత్మహత్య చేసుకుందని ఆరోపించారు. ఆమె అత్తింటి వారితో గొడవపడ్డారు. ఆ కోపంలో వాళ్ల ఇంటికి నిప్పంటించారు. పోలీసులు, ఫైర్ సిబ్బంది వచ్చి మంటలు ఆర్పివేశారు. అప్పటికే కేసర్వాణి అత్తామామలు సజీవదహనమయ్యారు. వారి డెడ్బాడీలను వెలికితీసి పోస్ట్ మార్టం కోసం ఆస్పత్రికి తరలించారు. మంటలంటుకుని ఆమె భర్తతో పాటు ఆడపడుచు, భర్త తమ్ముడి భార్యకు గాయాలైనట్లు పోలీసులు తెలిపారు.
