ఇండోర్‌: లెగ్ స్పిన్నర్‌ అలనా కింగ్‌ (7/18) సూపర్‌ పెర్ఫామెన్స్‌ చేయడంతో.. విమెన్స్‌ వరల్డ్‌ కప్ లీగ్‌ దశను ఆస్ట్రేలియా విజయంతో ముగించింది. చిన్న టార్గెట్‌ ఛేజింగ్‌‌‌‌లో బెత్‌ మూనీ (42), జార్జియా వోల్‌ (38 నాటౌట్‌) నిలకడగా ఆడటంతో.. శనివారం జరిగిన మ్యాచ్‌‌‌‌లో ఆసీస్ 7 వికెట్ల తేడాతో సౌతాఫ్రికాపై గెలిచింది. టాస్ ఓడిన సౌతాఫ్రికా 24 ఓవర్లలో 97 రన్స్‌‌‌‌కే కుప్పకూలింది. కెప్టెన్‌ లారా వోల్‌‌‌‌వర్త్‌ (31) టాప్‌ స్కోరర్‌. సినాలో జాఫ్తా (29), డి క్లెర్క్‌ (14) పోరాడి విఫలమయ్యారు.
ఆరంభంలో మేఘన్‌ షుట్‌ (1/21), కిమ్‌ గార్త్‌ (1/21) దెబ్బకు వోల్‌‌‌‌వర్త్‌, తజ్మిన్‌ బ్రిట్స్‌ (6) ఔట్‌‌‌‌కాగా, మిడిలార్డర్ను అలనా కింగ్‌ షేక్‌ చేసింది. కేవలం ఏడు ఓవర్లలో ఏడు వికెట్లు తీసింది. విమెన్స్‌ వన్డేల్లో బెస్ట్‌ పెర్ఫామెన్స్‌‌‌‌ను చూపెట్టడంతో పాటు మెగా కప్‌‌‌‌లో అత్యుత్తమ బౌలింగ్‌ గణాంకాలు నమోదు చేసింది.
తర్వాత ఛేజింగ్‌‌‌‌లో ఆస్ట్రేలియా 16.5 ఓవర్లలో 98/3 స్కోరు చేసి నెగ్గింది. లిచ్‌‌‌‌ఫీల్డ్‌ (5), ఎలైస్‌ పెర్రీ (0) నిరాశపర్చినా.. సదర్లాండ్‌ (10 నాటౌట్‌) ఫర్వాలేదనిపించింది. కింగ్‌‌‌‌కు ‘ప్లేయర్‌ ఆఫ్‌ ద మ్యాచ్‌’ అవార్డు లభించింది. సెమీస్లో ఇంగ్లండ్.. సౌతాఫ్రికాతో, ఇండియా.. ఆస్ట్రేలియాతో తలపడతాయి.
