ప్రపంచంలోనే అతి పెద్ద వరల్డ్ ట్రేడ్ సెంటర్‌ నిర్మాణానికి రాష్ట్ర రాజధాని హైదరాబాద్ సిద్ధమవుతోంది. శంషాబాద్‌ సమీపంలో సుమారు 50 నుంచి 60 ఎకరాల విస్తీర్ణంలో ఈ వరల్డ్ ట్రేడ్ సెంటర్‌ (డబ్ల్యూటీసీ) నిర్మాణం పనులు చకచకా సాగుతున్నాయి. ప్రస్తుతం దీని మొదటి దశ పనులు ఈ ఏడాది చివరి నాటికి పూర్తి కానుండగా.. ఇది 2025లో ప్రారంభం కానుంది.
3.5 మిలియన్ చదరపు అడుగుల విస్తీర్ణంలో నిర్మితమవుతోన్న ఈ ఐకానిక్ కాంప్లెక్స్ ప్రారంభోత్సవానికి సంబంధించి వరల్డ్ ట్రేడ్ సెంటర్స్ అసోసియేషన్ (WTCA) తమ అధికారిక తేదీలను త్వరలోనే వెల్లడించనుంది. హైదరాబాద్‌లో 50 నుంచి 60 ఎకరాల్లో నిర్మించబోయే ఈ అతి పెద్ద నిర్మాణంలో బహుళ టవర్లు ఉండనున్నాయి. ఒక్కో టవర్‌లో 12 అంతస్తులను నిర్మించనున్నారు.
ఈ విశాలమైన నిర్మాణంలో రెండు ఎత్తైన కార్యాలయ భవనాలు, ఒక హోటల్ టవర్ ఉండనున్నాయి. మేము 'వాక్ టు వర్క్' అని పిలిచే ఈ వినూత్న భావన.. సౌలభ్యాన్ని పునర్నిర్వచిస్తుందని వరల్డ్ ట్రేడ్ సెంటర్‌ అసోసియేట్ డైరెక్టర్ విఘ్నేష్ నొక్కి చెప్పారు. వాణిజ్య సేవలు ఇప్పటికే కార్యకలాపాలు ప్రారంభించాయన్నారు.
