న్యూయార్క్: ఖాభీ లేమ్ వయసు 22 ఏళ్లే! అయితేనేం.. ఇతడిపరిస్థితి తంతే గారెల బుట్టలో పడ్డట్టు ఉంది. మనోడికి డబ్బు వరదలా వచ్చి పారుతోంది. టిక్టాక్లో ఒక్క వీడియో పెడితే దాదాపు 7.50 లక్షల డాలర్లు (దాదాపు రూ.5.98 కోట్లు) వచ్చిపడుతున్నాయి. 2020లో కరోనా ఎక్కువగా ఉన్నప్పుడు లేమ్ టిక్టాక్కు ఎంట్రీ ఇచ్చాడు. అప్పటి నుంచి వెనక్కి చూడలేదు. ఇప్పుడు ఈ స్టార్కు 14.28 కోట్ల మంది ఫ్యాన్స్ ఉన్నారు. బ్రాండ్డీల్స్, స్పాన్సర్డ్ కంటెంట్, ఫీచర్ ఆఫర్ల ద్వారా డాలర్ల పంట పండిస్తున్నాడు. హ్యూగో బాస్ కోసం మిలన్ ఫ్యాషన్ వీక్ సందర్భంగా ఖాబీ ర్యాంప్పై క్యాట్వాక్ చేయడం, షో గురించి ఆన్లైన్లో పోస్ట్ చేయడం ద్వారా 4,50,000 డాలర్లు సంపాదించాడు. 2001లో సెనెగల్ నుండి తన తల్లిదండ్రులు, ముగ్గురు తోబుట్టువులతో ఇటలీకి వలస వచ్చిన లేమ్ ఇటీవల ఫార్చ్యూన్కి ఇంటర్వ్యూ ఇచ్చాడు. ఒక్కో క్లిప్కు 750,000 డాలర్ల వరకు సంపాదిస్తున్నట్లు వెల్లడించాడు. ఇంటర్నెట్ ఫేమ్ కొద్దికాలానికి మాత్రమే పాపులారిటీ ఉంటుందని చెప్పాడు. 'సైలెంట్హ్యూమర్'తో ఫేమస్ అయిన ఈ కుర్రోడు ఇప్పుడు ఇంగ్లీష్ కూడా నేర్చుకుంటున్నాడు.
ఇందుకోసం ప్రతిరోజూ ఒక ట్యూటర్ దగ్గరికి వెళ్తున్నాడు. అమెరికన్ సినిమాలు, కార్టూన్లనూ చూస్తున్నాడు. సినిమాల్లో పని చేయాలనే తన కోరికను కూడా బయటపెట్టాడు. "నాకు చిన్నప్పటి నుండి జోక్స్ అంటే ఇష్టం. ఇతరులను నవ్వించడం అంటే ఇష్టం. నా అభిరుచులను ఇతర ప్రపంచంతో పంచుకోవడానికి నాకు అవకాశం అందించిన టిక్ టాక్కి థ్యాంక్స్" అని లేమ్ 2021 ఆగస్టులో ఒక ప్రకటనలో పేర్కొన్నాడు. ఈ సంవత్సరం ప్రారంభంలో టీఎంజెడ్కి ఇచ్చిన ఇంటర్వ్యూలో మరో ఆసక్తికర విషయాన్ని బయటపెట్టాడు. లేమ్ లాస్ట్ టార్గెట్ ఏమిటంటే హాలీవుడ్ స్టార్ విల్ స్మిత్తో కలిసి నటించడం. స్మిత్ నటించిన 'ది ఫ్రెష్ ప్రిన్స్ ఆఫ్ బెల్-ఎయిర్'ను తన చిన్న వయస్సులోనే చూశానని, నటుడిగా మారడానికి ఆ సినిమా తనను ప్రేరేపించిందని చెప్పాడు.
