‘కేజీఎఫ్‌’ ఫ్రాంచైజీతో పాన్‌‌‌‌‌‌‌‌ఇండియా స్టార్‌‌‌‌‌‌గా ఎదిగిన కన్నడ హీరో యశ్.. ప్రస్తుతం ‘టాక్సిక్‌’ అనే చిత్రంలో హీరోగా నటిస్తున్నాడు. మరోవైపు ప్రెస్టిజీయస్ హిందీ ప్రాజెక్ట్‌ ‘రామాయణం’లో కీలకపాత్ర పోషిస్తున్నాడు. రణబీర్ కపూర్, సాయిపల్లవి జంటగా రూపొందుతున్న ఈ చిత్రంలో రావణుడిగా యశ్ కనిపించబోతున్నాడు. నితీష్ తివారీ దర్శకత్వంలో రెండు భాగాలుగా తెరకెక్కుతోన్న ఈ మూవీ షూటింగ్ శరవేగంగా జరుగుతోంది. ప్రస్తుతం ఇందులోని యాక్షన్ సీక్వెన్స్‌‌‌‌‌‌‌‌ల కోసం హాలీవుడ్ స్టంట్ డైరెక్టర్ గై నారిస్‌‌‌‌‌‌‌‌తో చేతులు కలిపాడు యశ్.
మ్యాడ్ మాక్స్ లాంటి హాలీవుడ్ హిట్స్‌‌‌‌‌‌‌‌లో స్టంట్స్ డిజైన్ చేసిన గై నారిస్, ఈ సినిమాలోని యాక్షన్ సన్నివేశాలను మరింత థ్రిల్లింగ్‌‌‌‌‌‌‌‌గా తీర్చిదిద్దుతున్నాడట. ఈ యాక్షన్ సీక్వెన్స్‌‌‌‌‌‌‌‌లు రావణుడి పాత్రకు కొత్త డైమెన్షన్‌‌‌‌‌‌‌‌ను తీసుకొస్తాయని టీమ్ భావిస్తోంది. ఈ సన్నివేశాలను ముంబైలోని ఓ భారీ సెట్‌‌‌‌‌‌‌‌లో చిత్రీకరిస్తున్నారు. తాజాగా సెట్‌ నుంచి విడుదల చేసిన మూవీ స్టిల్స్‌‌‌‌‌‌‌‌లో యశ్ యుద్ధానికి సిద్ధం అన్నట్టుగా కనిపిస్తున్నాడు. ఇందులో సన్నీ డియోల్ హనుమంతుడిగా, రవి దుబే కుంభకర్ణుడిగా నటిస్తున్నారు. ఈ మైథలాజికల్ చిత్రాన్ని నమిత్ మల్హోత్రా నిర్మిస్తుండగా, యశ్ కో ప్రొడ్యూసర్‌‌‌‌‌‌‌‌‌‌‌‌‌‌‌‌గా కూడా వ్యవహరిస్తున్నాడు. పార్ట్‌ 1ను వచ్చే దీపావళికి, పార్ట్‌ 2ను 2027 దీపావళికి రిలీజ్ చేయనున్నట్టు ఇప్పటికే ప్రకటించారు.
