- ముహూర్తం కోసం నామినేషన్లు లేట్!
- మొదటి విడత నామినేషన్లకు నేడు ఆఖరు
హైదరాబాద్, వెలుగు: పల్లెల్లో నామినేషన్ల పర్యం జోరుగా సాగుతోంది. అభ్యర్థులు పోటాపోటీగా నామిషనేషన్లు దాఖలు చేస్తున్నారు. నామినేషన్ కేంద్రాల వరకు మందీమార్బలంతో వెళ్లి తమ నామినేషన్లు సమర్పిస్తున్నారు. రెండోరోజు శుక్రవారం ఉదయం ముహూర్తం బాగాలేదని అభ్యర్థులు ఆలస్యంగా నామినేషన్లు వేయడం మొదలుపెట్టారు. దీంతో ఆర్వోలు సాయంత్రం 5 గంటల్లోపు వచ్చినవారి అందరి నామినేషన్లు స్వీకరించారు. రాష్ట్రవ్యాప్తంగా మొదటి విడత పంచాయతీ ఎన్నికలకు రెండో రోజు 4,236 సర్పంచ్ స్థానాలకు గాను 4,901 నామినేషన్లు రాగా.. రెండు రోజులు కలిపి మొత్తం 8,198 దాఖలయ్యాయి. 37,440 వార్డు స్థానాలకు గాను 9,643 నామినేషన్లు రాగా.. రెండు రోజుల్లో కలిపి 11,502 దాఖలయ్యాయి. అత్యధికంగా నల్గొండ జిల్లాలో సర్పంచ్ స్థానాలకు 796 నామినేషన్లు వచ్చాయి. అత్యల్పంగా ములుగు నుంచి 63 మాత్రమే నామినేషన్లు దాఖలయ్యాయి. వార్డు స్థానాల్లోనూ అత్యధికంగా నల్గొండ జిల్లాలో 974.. అత్యల్పంగా ములుగు జిల్లాలో 93 నామినేషన్లు దాఖలయ్యాయి.
నేటితో గడువు పూర్తి..
తొలి విడత గ్రామ పంచాయతీ ఎన్నికల నామినేషన్ల దాఖలు ప్రక్రియ శనివారంతో ముగియనుంది. ఆదివారం నామినేషన్ల పరిశీలన జరగనుంది. ఆ రోజు సాయంత్రం 5 తర్వాత చెల్లుబాటయ్యే అభ్యర్థుల జాబితా రెడీ చేస్తారు. సర్పంచ్, వార్డు మెంబర్‌ అభ్యర్థి నామినేషన్ తిరస్కరణకు గురైతే.. సదరు అభ్యర్థి సంబంధిత రెవెన్యూ డివిజనల్‌, సబ్‌ కలెక్టర్‌ వద్ద రిటర్నింగ్‌ అధికారి నిర్ణయంపై డిసెంబర్1న సాయంత్రం వరకు అప్పీలు చేసుకోవచ్చు. 2న అప్పీళ్లను పరిష్కరిస్తారు. 3న మధ్యాహ్నం 3 గంటల వరకు నామినేషన్ల ఉప సంహరణకు గడువు ఉంది. అదేరోజు మధ్యాహ్యం 3 గంటల తర్వాత బరిలో నిలిచిన అభ్యర్థుల జాబితాను ఎన్నికల అధికారులు ప్రకటిస్తారు.
ఇవి తప్పనిసరి..
గ్రామ పంచాయతీ తాజా ఓటరు జాబితా లేదా అభ్యర్థి, ప్రతిపాదకుడి పేరు ఓటరు జాబితాలో రికార్డయినట్టుగా జారీచేసిన సర్టిఫికెట్‌.. అభ్యర్థి వయసు ధ్రువీకరణకు సంబంధించిన ఆధారం. డిపాజిట్‌ చెల్లింపునకు సంబంధించిన రశీదు. నామినేషన్ పత్రం సమర్పించినట్టుగా రిటర్నింగ్‌ అధికారి నుంచి పొందిన రిసిప్ట్. ఎస్సీ, ఎస్టీ, బీసీ కేటగిరీలకు రిజర్వ్‌ అయిన సీట్లలో పోటీ చేసేవారు సందర్భాన్ని బట్టి అభ్యర్థి ఆయా కేటగిరీలకు చెందినవారిగా ఆధారాలు చూపాలి.
