- అందుబాటులో ఉండాలని నర్సాపూర్ నేతలకు సమాచారం
- మల్కాజ్ గిరి అభ్యర్థి కోసం ఫ్లాష్ సర్వేలు
హైదరాబాద్, వెలుగు: మల్కాజ్గిరి అసెంబ్లీ స్థానంతో పాటు పెండింగ్లో ఉన్న జనగామ, నర్సాపూర్, గోషామహల్, నాంపల్లి సీట్లలో అభ్యర్థుల ప్రకటనకు బీఆర్ఎస్ హైకమాండ్కసరత్తు చేస్తోంది. జనగామ టికెట్విషయంలో క్లారిటీ రావడంతో నర్సాపూర్ సీటుపై దృష్టి సారించింది. రెండు రోజుల్లో ఎప్పుడైనా పిలుపు రావొచ్చని అందుబాటులో ఉండాలని నియోజకవర్గ ఎమ్మెల్యే మదన్రెడ్డి, మహిళా కమిషన్ చైర్ పర్సన్ సునీతా లక్ష్మారెడ్డి సహా స్థానిక నాయకులకు సమాచారం ఇచ్చారు. సోమవారం వీరిద్దరితో మాట్లాడి టికెట్ ఎవరికి ఇస్తామనే దానిపై పార్టీ వర్కింగ్ ప్రెసిడెంట్ కేటీఆర్ క్లారిటీ ఇచ్చే అవకాశముంది. అదేరోజు గోషామహల్ నేతలను పిలిచి మాట్లాడనున్నారు. మైనంపల్లి హన్మంతరావు పార్టీని వీడటంతో మల్కాజ్ గిరి సీటు ఎవరికి ఇవ్వాలనే దానిపై కేసీఆర్, కేటీఆర్ సర్వే రిపోర్టులు తెప్పించుకొని పరిశీలిస్తున్నారు. ఈ సీటు మర్రి రాజశేఖర్రెడ్డికే దక్కుతుందని మంత్రి మల్లారెడ్డి వర్గీయులు ధీమాగా ఉన్నారు. ఈ సీటు దక్కించుకోవాలని ఎమ్మెల్సీ శంభీపూర్రాజు, మాజీ ఎమ్మెల్యే చింతల కనకారెడ్డి కోడలు, కార్పొరేటర్ విజయశాంతిరెడ్డితో పాటు పలువురు నేతలు ప్రయత్నిస్తున్నారు. నాంపల్లి సీటుపై పెద్దగా పేచీ లేకపోవడంతో అక్కడ అభ్యర్థిని ప్రకటించనున్నారు.
మల్కాజ్ గిరిలో ప్రత్యామ్నాయాలపై ఫోకస్
మల్కాజ్ గిరి టికెట్ తనకుఇచ్చినా, తన కొడుకు రోహిత్కు మెదక్ టికెట్ఇవ్వలేదని ఆగ్రహించిన మైనంపల్లి హన్మంతరావు తాజాగా బీఆర్ఎస్కు గుడ్బై చెప్పడంతో అక్కడ ప్రత్యామ్నాయాలపై బీఆర్ఎస్ హైకమాండ్ ఫోకస్ పెట్టింది. ఆగస్టు 21న మధ్యాహ్నం కేసీఆర్ అభ్యర్థులను ప్రకటించడానికి ముందు.. అదేరోజు ఉదయం తిరుమలలో మంత్రి హరీశ్రావుపై మైనంపల్లి తీవ్ర వ్యాఖ్యలు చేశారు. తర్వాతా ఆరోపణలు చేసినా ఆయనపై ఎలాంటి చర్యలు తీసుకోలేదు. మైనంపల్లిని బుజ్జగించవచ్చనే కారణంతోనే చర్యలకు వెనుకాడినట్టు తెలుస్తోంది. కానీ రెండు సీట్లలో పోటీపై పట్టుదలతో ఉన్న మైనంపల్లి బీఆర్ఎస్ను వీడుతున్నట్టు ప్రకటించారు. దీంతో ప్రత్యామ్నాయాలపై పార్టీ ఫోకస్ చేసింది. ఎవరైతే గెలుస్తారనే దానిపై ఫ్లాష్ సర్వేలు చేయిస్తున్నారు. ఆ సర్వే రిపోర్టులతో పాటు టికెట్ కోసం పోటీ పడుతున్న అభ్యర్థుల వ్యక్తిగత అంశాలను పరిగణనలోకి తీసుకొని ఈ స్థానానికి అభ్యర్థిని ఖరారు చేయనున్నారు. మంగళ, బుధవారాల్లోనే ఐదు స్థానాలకు అభ్యర్థులను ప్రకటించే అవకాశముందని పార్టీ వర్గాలు చెప్తున్నాయి. ఏదైనా కారణాలతో చేయలేకపోతే ఒకటి, రెండు రోజులు ఆలస్యంగానైనా ఈ వారంలోనే అభ్యర్థులను ప్రకటిస్తారని తెలిసింది.
స్థానికులు, ఉద్యమకారులకే టికెటివ్వాలె
మల్కాజ్ గిరికి చెందిన స్థానికులు, తెలంగాణ ఉద్యమకారులకే టికెట్ఇవ్వాలని స్థానిక బీఆర్ఎస్నాయకులు డిమాండ్ చేశారు. మైనంపల్లి పార్టీని వీడిన నేపథ్యంలో 2001 నుంచి బీఆర్ఎస్లో పని చేస్తున్న నాయకులు శనివారం స్థానిక ఫంక్షన్ హాల్లో సమావేశమయ్యారు. మాజీ కార్పొరేటర్లు బద్దం పరుశురాం రెడ్డి, జితేందర్రెడ్డి, నాయకులు సిద్ది రాములు, వెంకన్న, ఖలీల్, రఘు యాదవ్, శేఖర్గౌడ్మాట్లాడుతూ.. మల్కాజ్ గిరి ఎమ్మెల్యే టికెట్రెండుసార్లు ఆల్వాల్ లీడర్లకే ఇచ్చారని, ఈసారి స్థానికులు, తెలంగాణ ఉద్యమంలో యాక్టివ్గా పని చేసిన వారికే ఇవ్వాలన్నారు. తమలో ఒకరికి టికెట్ఇస్తే భారీ మెజార్టీతో గెలిపించుకుంటామని తెలిపారు. స్థానికేతరులకే టికెట్ఇస్తున్నట్టుగా కొందరు ప్రచారం చేసుకుంటున్నారని, ఇప్పుడు కూడా ఉద్యమకారులు, స్థానికులను విస్మరించడం తగదన్నారు.
