వేడెక్కిన పల్లె పాలిటిక్స్.. పార్టీల వారీగా మీటింగ్ లు.. ఎక్కడిక్కడ చర్చలు

• అవకాశమివ్వాలని ఎమ్మెల్యేలు, పార్టీల పెద్దలను కోరుతున్న ఆశావహులు
• గెలుస్తారనుకుంటే ఓకే చెబుతున్న పార్టీల పెద్దలు 

యాదాద్రి, సూర్యాపేట, వెలుగు: మొదటి దశ పంచాయతీ ఎన్నికల నామినేషన్ల ప్రక్రియ ఊపందుకుంది. పల్లె పాలిటిక్స్​ వేడెక్కాయి. తమకు చాన్సివ్వాలని కోరుతూ ఎమ్మెల్యేలు, లీడర్లకు వినతులు ఇస్తున్నారు. ఎక్కడికక్కడ మీటింగ్​లు.. ఎవరెవరికి టికెట్లు దక్కుతాయి.  టికెట్లు దక్కకున్నా.. నామినేషన్లు వేస్తారా..? అన్న అంశంపై  చర్చలు జరుగుతున్నాయి. 

ఎక్కడికక్కడ మీటింగ్​లు

పంచాయతీ ఎన్నికలపై ప్రధాన పార్టీలైన కాంగ్రెస్​, బీఆర్​ఎస్​, బీజేపీ మండలాలు, గ్రామాల వారీగా ఎక్కడికక్కడ మీటింగ్​లు నిర్వహిస్తున్నారు. టికెట్​ ఆశిస్తున్న వ్యక్తుల బలమెంత..? ఆర్థికంగా బలంగా ఉన్నాడా..?  వంటి అంశాలను తెలుసుకుంటున్నారు. ఆశించే వ్యక్తులకు గెలిచే అవకాశాలు ఉన్నాయా..? లేకుంటే ఎవరికి ఇవ్వాలన్న దానిపై ఆరా తీస్తున్నాయి. అయితే కొన్ని చోట్ల పది మంది వరకూ పోటీ పడుతుండడం ఇబ్బందికరంగా మారింది. దీంతో పల్లె రాజకీయాలు వేడెక్కుతున్నాయి. 

ఒక్క అవకాశమివ్వండి..

సర్పంచ్​గా పోటీ  చేయడానికి ఒక్క అవకాశమివ్వండంటూ ఎమ్మెల్యేలు, మాజీ ఎమ్మెల్యేలు, పార్టీల ముఖ్య నేతలకు గ్రామ స్థాయి నుంచి విజ్ఞాపణలు అందుతున్నాయి. సర్పంచ్​ కావాలన్న ఆశతో సొంత గ్రామాలను పట్టుకొని ఉంటున్నామంటూ ఆశావహులు చెప్పుకుంటున్నారు.  మరి కొందరైతే ఇన్నేండ్లుగా తాము చేసిన ఖర్చును వివరిస్తున్నారు. పంచాయతీల గడువు ముగిసినప్పటి నుంచి ఎదురు చేస్తున్నామని, అవకాశం ఇస్తే ఖర్చుకు వెనుకాడకుండా గెలిచి చూపిస్తామని చెబుతున్నారు. 

గెలుస్తారనుకుంటే.. ఓకే

అయితే ఎమ్మెల్యేలు, లీడర్లు మాత్రం సర్పంచ్​ టికెట్​ ఆశిస్తున్నవారిని అటు నారాజ్​ చేయకుండా నచ్చజెప్పే ప్రయత్నాలు చేస్తున్నారు. గెలిచే క్యాండిడేటే అనుకుంటే మాత్రం ఓకే చెప్పేస్తున్నారు. దాదాపు రెండేండ్ల విరామం తర్వాత జరుగుతున్న ఎన్నికలు కావడంతో గెలిచే వారివైపే రాజకీయ పార్టీల లీడర్లు చూస్తున్నారు. గెలిచే అవకాశాలు లేని వారికి మాత్రం నచ్చజెప్పే ప్రయత్నాలు చేస్తున్నారు. ఖర్చు ఎక్కువగా అయ్యేట్టు ఉందని వారిని వెనక్కితగ్గే విధంగా చూస్తున్నారు. ఈ ఎన్నికల తర్వాత జరగబోయే మండల పరిషత్​ ఎన్నికలను ప్రస్తావిస్తున్నారు.  ఎంపీటీసీ, ఎంపీపీ, జెడ్పీటీసీ పదవులు దక్కే అవకాశాలను గుర్తు చేస్తున్నారు. అయినా సరే తనకు సర్పంచ్​ కావాలని పట్టుబట్టేవారిని మాత్రం దూరం పెట్టేస్తున్నారు. 

ఇవ్వకుంటే ఇంకో పార్టీ.. అది కాకుంటే ఇండిపెండెంట్​

సర్పంచ్​ టికెట్ల విషయంలో కొందరు మరీ పట్టుదలగా వ్యవహరిస్తున్నారు. పార్టీకి ఇన్నేండ్లుగా సేవ చేస్తన్న తాను కచ్చితంగా పోటీ చేస్తానని చెప్పేస్తున్నారు. కాదంటే ఇతర పార్టీల నుంచి పోటీ చేస్తానని, అదీకాకుంటే ఇండిపెండెంట్​గా బరిలో ఉంటానని తేల్చి చెబుతున్నారు. ఈ తరహాలో కొన్ని చోట్ల ఒకే పార్టీకి చెందిన ఇద్దరు, ముగ్గురు నామినేషన్లు వేసిన ఉదంతాలున్నాయి.ఇంకొందరైతే తనకు ఇవ్వకున్నా సరే.. వేరొకరికి ఇవ్వవద్దంటూ లీడర్లను కోరుతున్నారు.