- తెలంగాణలో మొదటి లేదా రెండోస్థానంలో బీజేపీ
- ఒడిశా, బెంగాల్లో బీజేపీ హవా
- 370కు పైగా సీట్లు మాత్రం గెలిచే అవకాశం లేదన్న స్ట్రాటజిస్ట్
న్యూఢిల్లీ: కేంద్రంలో మళ్లీ బీజేపీ సర్కారే వస్తుందని ఎన్నికల వ్యూహకర్త ప్రశాంత్ కిశోర్ తెలిపారు. ఆ పార్టీకి 300కు పైగా సీట్లు వస్తాయని చెప్పారు. తూర్పు, దక్షిణ భారతదేశంలో కాషాయ పార్టీ సీట్లు, ఓట్ల శాతంలో గణనీయమైన పురోగతి సాధిస్తుందని వివరించారు. ఓ ఇంటర్వ్యూలో ఆయన తన అభిప్రాయాలను పంచుకున్నారు. ప్రస్తుతం దేశంలో బీజేపీ తిరుగులేని ఆధిపత్యంలో ఉందన్నారు. అయినప్పటికీ ఆ పార్టీ ప్రధానమంత్రి మోదీని అధిగమించడం అసాధ్యమేమీ కాదని చెప్పారు. బీజేపీని అడ్డుకునేందుకు ప్రతిపక్షానికి అవకాశాలుండేవని, కానీ బద్ధకం, తప్పుడు వ్యూహాలతో కాలదన్నుకున్నయని విశ్లేషించారు.
తెలంగాణలో ఫస్ట్ లేదా సెకండ్ స్థానంలో బీజేపీ..
తెలంగాణలో బీజేపీ మొదటి లేదా రెండో స్థానంలో ఉంటుందని, ఇది వారికి చాలా పెద్ద విషయమని ప్రశాంత్కిశోర్ పేర్కొన్నారు. ఒడిశా, బెంగాల్లలో బీజేపీ నంబర్ వన్ స్థానంలో ఉండటం ఖాయమని చెప్పారు. తమిళనాడులో డబుల్ డిజిట్ ఓట్ల శాతం సాధిస్తుందని చెప్పారు. అయితే, బీజేపీ ఆశిస్తున్నట్టుగా ఈసారి 370కుపైగా సీట్లు వచ్చే అవకాశం మాత్రంలేదని ప్రశాంత్ కిశోర్ వెల్లడించారు.
ఉత్తర, పశ్చిమ భారత్లో బీజేపీకే పట్టు
ఉత్తర, పశ్చిమ భారతదేశంలో బీజేపీ పట్టు నిలుపుకుంటుందని ప్రశాంత్ కిశోర్ తెలిపారు. ఇక్కడ కాంగ్రెస్ సహా ప్రతిపక్షాలు బీజేపీ 100 సీట్లు గెలవకుండా అడ్డుకోగలిగితేనే బీజేపీకి ఎదురుదెబ్బ తగులుతుందని, కానీ ఆ అవకాశం లేదని చెప్పారు. ఈ సారి తూర్పు, దక్షిణ భారతదేశంపై బీజేపీ ప్రత్యేక దృష్టిసారించిందని తెలిపారు. ప్రతిపక్షాలు మాత్రం ఇక్కడ ఆ దిశగా ప్రయత్నాలు చేయలేదని అన్నారు. యూపీ, బిహార్, మధ్యప్రదేశ్, మణిపూర్, మేఘాలయాలో మాత్రమే పర్యటిస్తే తమిళనాడులో ఎలా గెలుస్తారు? అని కాంగ్రెస్ను ఆయన ప్రశ్నించారు.
జగన్ గెలుపు చాలా కష్టం
అసెంబ్లీ ఎన్నికలు జరుగుతున్న ఆంధ్రప్రదేశ్లో సీఎం జగన్ సర్కారు మళ్లీ రావడం చాలాకష్టమని ప్రశాంత్కిశోర్ అభిప్రాయపడ్డారు. ‘చత్తీస్గఢ్ సీఎం భూపేశ్ బాఘెల్లాగా జగన్కూడా ప్రజల ఆకాంక్షలను నెరవేర్చడానికి బదులుగా నియోజకవర్గాలకు ప్రొవైడర్ మోడ్లాగే ఉండిపోయారు. చక్రవర్తిలాగా ప్రజలకు తాయిలాలు ఇస్తూ.. ఉద్యోగాలు ఇవ్వడం మరిచారు. రాష్ట్రఅభివృద్ధి కోసం ఏమీ చేయలేదు’ అని వ్యాఖ్యానించారు.
