సీనియర్ నటుడు మురళీధర్ గౌడ్, ప్రముఖ నటి సుధ ప్రధాన పాత్రల్లో నటించిన భావోద్వేగ ప్రధాన చిత్రం ‘వెంకట్రామయ్య గారి తాలూకా’. ‘జయమ్మ పంచాయతీ’ ఫేమ్ దినేష్ కుమార్ ఈ చిత్రంతో హీరోగా ప్రేక్షకుల ముందుకు రాబోతున్నారు. ఈటీవీ ప్రభాకర్ కుమార్తె దివిజ ప్రభాకర్ హీరోయిన్గా నటిస్తున్నారు.
తండ్రి–పిల్లల మధ్య అనుబంధం, బాధ్యతలు, భావోద్వేగాల నేపథ్యంలో సాగే ఈ చిత్రాన్ని దర్శకుడు సతీష్ ఆవాల తెరకెక్కిస్తున్నారు. కోమలి క్రియేషన్స్ బ్యానర్పై కోమలి మహేందర్ తొట్టె, సోమేష్ సారిపల్లి ఈ సినిమాను ప్రతిష్టాత్మకంగా నిర్మించారు. విలేజ్ బ్యాక్ డ్రాప్లో సాగే అందమైన ప్రేమకథతో పాటు ఫాదర్ సెంటిమెంట్ ఈ చిత్రానికి ప్రధాన ఆకర్షణగా నిలవనుంది.
ఈ మూవీలో సీనియర్ దర్శకుడు, నటుడు యనమదల కాశీవిశ్వనాథ్, మిర్చి మాధవి, జబర్దస్త్ ఫేమ్ సత్యశ్రీ, మొగలిరేకులు సీరియల్ ఫేమ్ ఇక్బాల్ తదితరులు కీలక పాత్రలు పోషించారు.
తాజాగా ఈ చిత్ర టైటిల్ పోస్టర్, ఫస్ట్ లుక్ను తెలుగు ఫిల్మ్ ఛాంబర్ అధ్యక్షుడు, ప్రముఖ నిర్మాత దగ్గుబాటి సురేష్ బాబు ఆవిష్కరించారు. టైటిల్ ఎంతో ఆసక్తికరంగా ఉందని, సినిమా కూడా అదే స్థాయిలో ప్రేక్షకులను ఆకట్టుకుంటుందని ఆయన అభిప్రాయపడ్డారు. త్వరలో ఈ మూవీ నుంచి మరిన్ని అప్డేట్స్ రానున్నట్లు చిత్రబృందం తెలిపింది.
