రామకృష్ణాపూర్, వెలుగు: మంచిర్యాల జిల్లా మందమర్రి ఏరియా రామకృష్ణాపూర్లోని సింగరేణి ఏరియా ఆస్పత్రిలో ఆరు నెలలుగా ఎక్స్ రే మెషీన్ పనిచేయడంలేదు. గనుల్లో ఆక్సిడెంట్లు, రోడ్డు ప్రమాదాల్లో కాలు, చేతులు విరిగిన పేషెంట్లు, ఇతర రోగాలతో వచ్చే వారు నానా ఇబ్బందులు పడుతున్నారు. డిజిటల్ ఎక్స్రే యూనిట్ పనిచేయకపోవడంతో డాక్టర్లు మాన్యూవల్ ఫిల్మ్ ఎక్స్రేపై ఆధారపడాల్సిన పరిస్థితి నెలకొంది. మరోవైపు ఎక్స్రే రిపోర్ట్ కోసం రోజంతా వేచి ఉండాల్సి వస్తోంది. కొందరు బయట నుంచి డిజిటల్ ఎక్స్రే రిపోర్టు తేవడంతో ఆర్థికంగా నష్టపోతున్నారు. అయినా నెలలు గడుస్తున్నా కొత్త ఎక్స్రే మెషీన్ ఏర్పాటు చేయడం లేదని కార్మికులు సింగరేణి యాజమాన్యంపై ఫైర్ అవుతున్నారు.
బెల్లంపల్లి రీజియన్లో కీలకం…
సింగరేణి ఏరియా ఆస్పత్రి బెల్లంపల్లి రీజియన్ పరిధిలో మందమర్రి, శ్రీరాంపూర్, బెల్లంపల్లి ఏరియాలకు కీలమైంది. దీంతోపాటు, మందమర్రి లోని డిస్పెన్సరీ, శ్రీరాంపూర్ ఏరియాలో రెండు డిస్పెన్సరీలు, జైపూర్లో ఒక డిస్పెన్సరీ ద్వారా సాధారణ వైద్య సేవలు అందుతుండగా ఎమర్జెన్సీ, ఇతర కీలక ట్రీట్మెంట్కు సింగరేణి ఏరియా ఆస్పత్రిపై ఆధారపడాల్సిందే. నిత్యం వందలాది సంఖ్యలో ట్రీట్మెంట్ కోసం ఆర్కేపీ ఏరియా ఆసుపత్రికి వస్తారు. సాధారణంగా ప్రతిరోజు ఆసుపత్రిలో 80 నుంచి 150 మందికి పైగా ఎక్స్రే తీస్తారు. అయితే ఆరు నెలలుగా పేషీన్ పనిచేయకపోవడంతో పెషెంట్లు ఇబ్బందులు పడుతున్నారు. మరోవైపు ఎమర్జెన్సీ కేసులకు సంబంధించి ఎక్స్కే రిపోర్టు కోసం మాన్యువల్ ఫిల్మ్ డెవలపింగ్ సిస్టంపై ఆధారపడుతున్నారు. దీంతో కార్మిక కుటుంబాలు రిపోర్టు కోసం రోజంతా ఆస్పత్రిలో పడిగాపులు కాస్తున్నారు. ఆ రిపోర్టును మరుసటి రోజు డాక్టర్ వద్దకు తీసుకవెళ్లడంతో ట్రీట్మెంట్ లో ఆలస్యం అవుతోంది. ప్రైవేటు కంపెనీ ఆధ్వర్యంలో ఆసుపత్రిలోని సీటీస్కాన్ ను ఎమర్జెన్సీ ఎక్స్రే కోసం డాక్టర్లు అవసరాన్ని బట్టి వాడుతున్నారు. ఆస్పత్రిలో కొత్త ఎక్స్రే యూనిట్ను ఏర్పాటు చేయాలని రోగులు కోరుతున్నారు.
రోగులకు ఇబ్బందులు లేకుండా చూస్తున్నాం
ఎక్స్రే మెషీన్ అవసరమైన పరికరాలు అందుబాటులో లేక పనిచేయడంలేదు. సమస్యను ఉన్నతాధికారుల దృష్టికి తీసుకవెళ్లాం. రోగులకు ఇబ్బంది కలుగకుండా ప్రస్తుతం మాన్యువల్ ఫిల్మ్ రిపోర్టు ఇస్తున్నాం. సింగరేణి కార్పోరేట్ యాజమాన్యం, రూ.22లక్షలతో కొత్తగా మెషీన్ను కొనే ప్రక్రియ చేపట్టింది. త్వరలోనే కొత్త మెషీన్ ఏర్పాటు చేస్తాం. - డాక్టర్ ఉషా, డీవైసీఎంవో , ఆర్కేపీ సింగరేణి ఏరియా ఆసుపత్రి
