రెండేండ్ల తర్వాత గ్రీన్సిగ్నల్ ఇచ్చిన సీఎం కేసీఆర్
హైలెవల్ మీటింగ్లో రివ్యూ చేసి గైడ్లైన్స్ జారీ చేయాలని నిర్ణయం
2019లో చట్టం చేసిన కేంద్రం.. ఇన్నాళ్లూ స్పందించని రాష్ట్రం
ఆందోళనలతో దిగొచ్చి అమలు చేస్తామని ప్రకటన
60 శాతానికి రిజర్వేషన్లు.. ఓపెన్ కోటా 40 శాతానికే పరిమితం
వచ్చే అకడమిక్ ఇయర్ నుంచి అమలు
హైదరాబాద్‌, వెలుగు: రాష్ట్రంలో ఫార్వార్డ్ క్యాస్ట్లోని ఆర్థికంగా వెనుకబడిన వర్గాలకు (ఈడబ్ల్యూఎస్) రిజర్వేషన్లు అమలు చేయాలని సీఎం కేసీఆర్ నిర్ణయించారు. రెండు, మూడు రోజుల్లోనే దీనిపై హైలెవల్ రివ్యూ నిర్వహించి ఆదేశాలు జారీ చేయనున్నారు. ఈ మేరకు సీఎంవో గురువారం ప్రకటన రిలీజ్ చేసింది. ఫైనాన్షియల్గా వెనుకబడిన పెద్ద కులాల వారికి విద్య, ఉద్యోగ అవకాశాలు కల్పించేందుకు కేంద్రం తెచ్చిన పది శాతం ఈడబ్ల్యూఎస్ రిజర్వేషన్ల అమలుకు చర్యలు తీసుకోవాలని సీఎం కేసీఆర్ అధికారులను ఆదేశించారు. ప్రస్తుత రిజర్వేషన్లను కొనసాగిస్తూనే అదనంగా ఈడబ్ల్యూఎస్ రిజర్వేషన్లను అమలు చేస్తామన్నారు. రాష్ట్రంలో ప్రస్తుతం ఎస్సీ, ఎస్టీ, బీసీ, మైనార్టీలకు కలిపి 50% రిజర్వేషన్లు ఉన్నాయని, కొత్త రిజర్వేషన్ కలిపితే 60శాతానికి పెరుగుతాయని తెలిపారు. అయితే ఈడబ్ల్యూఎస్ రిజర్వేషన్ల అమలు డిమాండ్తో ఈ నెల 27న బీజేపీ దీక్ష చేపడతామని ప్రకటించడంతోనే రాష్ట్ర సర్కారు ఈ నిర్ణయం తీసుకుందని రాజకీయ వర్గాల్లో చర్చ జరుగుతోంది.
రెండేండ్ల ఆలస్యంతో ఎందరికో నష్టం
ఫైనాన్షియల్గా వెనుకబడిన వర్గాల వారికి 10 శాతం రిజర్వేషన్లు ఇచ్చేందుకు కేంద్ర సర్కారు 2019 జనవరిలో చట్టం చేసింది. దానిని చాలా రాష్ట్రాలు అమలు చేశాయి. కానీ రాష్ట్రంలో టీఆర్ఎస్ సర్కారు అమలు చెయ్యలేదు. ఈడబ్ల్యూఎస్ చట్టాన్ని అమలు చేయాలని ఆయా వర్గాల నుంచి వచ్చిన విజ్ఞప్తులను పట్టించుకోలేదు. దీంతో రాష్ట్రంలో వేలాది మంది నష్టపోయారన్న విమర్శలు ఉన్నాయి. రెండు ఎడ్యుకేషన్ ఇయర్స్ 2019–20, 2020–-21లో స్టూడెంట్లు ఈడబ్ల్యూఎస్ ప్రయోజనాలు అందుకోలేకపోయారు. రాష్ట్ర పరిధిలో జరిగే ఇంటర్, డిగ్రీ, ఇంజనీరింగ్, పీజీ, లా, పాలిటెక్నిక్, ఐటీఐ కోర్సుల్లో అడ్మిషన్లు పొందలేకపోయారు. ఈ నష్టానికి టీఆర్ఎస్ సర్కారు ఏ రకంగా బాధ్యత వహిస్తుందన్న ప్రశ్నలు వస్తున్నాయి.
ఏ వర్గాలకు ఎంత రిజర్వేషన్?
రాష్ట్రంలో ప్రస్తుతం 50% రిజర్వేషన్లు అమలవుతున్నాయి. బీసీలకు 25%, ఎస్సీలకు 15, ఎస్టీలకు 6, బీసీ ఈ కింద 4% కేటాయించారు. ఇప్పుడు 10% ఈడబ్ల్యూఎస్ రిజర్వేషన్లు ఇస్తుండటంతో.. ఓపెన్ కోటా 40 శాతమే ఉంటుంది. 2021–22 నుంచి ఈడబ్ల్యూఎస్ కోటా అమలుచేసే చాన్స్ ఉన్నట్టు ఆధికారులు చెప్తున్నారు. త్వరలో సర్కారు విడుదల చేయనున్న ఉద్యోగాల భర్తీ నోటిఫికేషన్లలోనూ ఈడబ్ల్యూఎస్ కోటా అమలయ్యే అవకాశం ఉంది.
ఎంబీబీఎస్లో రెండేళ్ల కిందటి నుంచే..
ఎంబీబీఎస్ సీట్ల భర్తీలో 2019 నుంచే ఈడబ్ల్యూఎస్ రిజర్వేషన్లు అమలు చేస్తున్నారు. ఈడబ్ల్యూఎస్ రిజర్వేషన్లు అమలు చేసే రాష్ట్రాల్లోని మెడికల్ కాలేజీలకు మెడికల్కౌన్సిల్ (ఎంసీఐ) అదనంగా ఎంబీబీఎస్ సీట్లను ఇచ్చింది. మన రాష్ట్రానికి ఈ కేటగిరీలో 190 సీట్లు అదనంగా వచ్చినయి. రిజర్వేషన్ ఇవ్వకుంటే ఈ సీట్లు కోల్పోతామన్న ఉద్దేశంతో అమలుకు రాష్ట్ర సర్కార్ ముందుకొచ్చింది.
ముస్లిం, ఎస్టీ రిజర్వేషన్ల పెంపు హామీ అమలేదీ?
రాష్ట్రంలో ముస్లిం, ఎస్టీ రిజర్వేషన్లను పెం చుతామని 2014 అసెంబ్లీ ఎలక్షన్ మేనిఫెస్టోలో టీఆర్ఎస్ ప్రకటించింది. ఆ ఎలక్షన్లలో గెలిచాక అసెంబ్లీలో ఓ తీర్మానం చేసి కేంద్రానికి పంపింది. ఇప్పటికే బీసీఈ కోటా కింద ముస్లింలకు ఉన్న 4 శాతం రిజర్వేషన్లను 12 శాతానికి పెంచాలని, ఎస్టీ రిజర్వేషన్లను ఆరు నుంచి 12 శాతానికి పెంచాలని అందులో పేర్కొంది. కానీ ఆ తర్వాత పెద్దగా పట్టించుకోలేదని, చట్టసవరణ చెయ్యాలని కేంద్రంపై ఒత్తిడి చెయ్యలేదన్న విమర్శలు ఉన్నాయి . 2018 ఎన్నికల మేనిఫెస్టోలో కూడా ముస్లిం, ఎస్టీ రిజర్వేషన్లు పెంచుతామని టీఆర్ఎస్ పేర్కొంది. కానీ ఇంతవరకు ఈ విషయంపై కేంద్రానికి ఎలాంటి విజ్ఞప్తులు చేయలేదని ఆయా వర్గాల నేతలు అంటున్నారు.
