న్యూఢిల్లీ: హెచ్సీఎల్ టెక్నాలజీస్ అంచనాలను మించిన ఫలితాలు ప్రకటించింది. నాలుగో క్వార్టర్లో కంపెనీకి రూ. 3,983 కోట్ల కన్సాలిడేటెడ్ నికర లాభం వచ్చింది. ఇది అంతకు ముందు ఏడాది క్యూ4 తో పోలిస్తే 10.85 శాతం ఎక్కువ. కానీ, సెక్వెన్షియల్గా చూస్తే మాత్రం నికర లాభం 2.8 శాతం తగ్గిపోయింది. నాలుగో క్వార్టర్లో హెచ్సీఎల్ టెక్నాలజీస్ ఆపరేటింగ్ లాభం 7.5 శాతం తగ్గినా, ఏడాది కాలానికి చూసినప్పుడు 18.8 శాతం పెరిగింది. మార్చి 2023 తో ముగిసిన క్వార్టర్లో కంపెనీ రెవెన్యూ 17.74 శాతం ఎక్కువై రూ. 26,606 కోట్లకు చేరింది.
డిసెంబర్ 2022 క్వార్టర్లో కంపెనీకి రూ. 26,700 కోట్ల రెవెన్యూ వచ్చింది. మార్చి 2023 క్వార్టర్లో సర్వీసెస్ రెవెన్యూ 10.6 శాతం పెరిగిందని, డిజిటల్ రెవెన్యూ ఏడాది కాలంలో 16.9 శాతం జంప్ అయిందని కంపెనీ వెల్లడించింది. నాలుగో క్వార్టర్లో 13 పెద్ద డీల్స్ను హెచ్సీఎల్ టెక్నాలజీస్ దక్కించుకుంది. ఇక నాలుగో క్వార్టర్లో ఉద్యోగుల సంఖ్య 3,674 పెరిగి 2,25,944 కి చేరినట్లు కూడా కంపెనీ తెలిపింది. మరో ఏడాది మంచి ప్రోగ్రెస్ కనబరచగలిగామని హెచ్సీఎల్ చైర్పర్సన్ రోష్నీ నాడార్ మల్హోత్రా చెప్పారు.
