వెలుగు: జమ్మూ కశ్మీర్కు ప్రత్యేక ప్రతిపత్తి కల్పిస్తున్న ఆర్టికల్35-–ఏ విషయంలో జరుగుతున్న రగడతో కశ్మీరీల్లో ఆందోళన నెలకొంది. కేంద్ర ప్రభుత్వం ఈ ఆర్టికల్ను రద్దు చేయాలన్న ఆలోచనలో ఉందన్న వార్తలతో రాష్ట్ర వ్యాప్తంగా నిరసన ప్రదర్శనలు జరుగుతున్నాయి. ఆర్టికల్ను రద్దు చేయాలంటూ దాఖలైన పిటిషన్లను సుప్రీం కోర్టు మంగళవారం నుంచి విచారిస్తుంది. ఈ నేపథ్యంలో సుమారు 200 మందికి పైగా వేర్పాటువాదులను పోలీసులు అదుపులోకి తీసుకున్నారు. ముఖ్యంగా జమాతే ఇస్లామీ సభ్యులే ఇందులో ఎక్కువగా ఉన్నారు.
ఆర్టికల్ విషయంలో జమ్మూకశ్మీర్కు చెందిన రాజకీయ పార్టీలు రెండుగా చీలిపోయాయి. బీజేపీ ఈ ఆర్టికల్రద్దును సపోర్ట్చేస్తుండగా, ఎన్సీ, పీడీపీలు ఆర్టికల్35-ఏ జోలికి వెళ్లకూడదని డిమాండ్ చేస్తున్నాయి. కాశ్మీరీలకు ప్రత్యేక హక్కులు కట్టబెట్టి న ఆర్టికల్35–ఏ కు రాజ్యాంగ హోదా లేదని పిటిషనర్లు వాదిస్తున్నారు. దీనిని రాజ్యాంగ సవరణంటూ చెప్పడంకూడా కరెక్ట్కాదంటున్నారు. జమ్మూకశ్మీర్విషయంలో పార్లమెంట్ హక్కులను తగ్గిస్తూ ప్రెసిడెంట్ జారీచేసిన ఉత్తర్వులను పిటిషనర్లు సవాల్చేశారు. వీటికి రాజ్యాంగపరంగా ఉన్న హక్కులు వెల్లడించాలని కోరారు. రాజ్యాంగానికి సవరణ చేసే హక్కు ప్రెసిడెంట్ కు లేదంటున్నారు. రాజ్యాంగంలో శాశ్వత ప్రాతిపదికన కొత్త ఆర్టికల్ను చేర్పించే అధికారం ప్రెసిడెంట్ కు లేదని వాదిస్తున్నారు. రాష్ట్రంలో పర్మినెంట్ రెసిడెన్సీపై అమలుచేస్తున్న షరతులనూ పిటిషనర్లు సవాల్చేశారు. నిరసన ప్రదర్శనల నేపథ్యంలో రాష్ట్రంలోని పలు సమస్యాత్మక ప్రాంతాల్లో ప్రభుత్వం ఆంక్షలు విధించింది. కొన్ని చోట్ల 144 సెక్షన్విధించింది. వేర్పాటు వాదుల బంద్పిలుపుతో షాపులు మూతపడ్డాయి. ఇంటర్నెట్ స్పీడ్ను అధికారులు 2జీకి తగ్గించారు.
