కందనూలు, వెలుగు: అక్రమంగా తరలిస్తున్న 60 క్వింటాళ్ల రేషన్ బియ్యాన్ని రెవెన్యూ ఎన్ ఫోర్స్ మెంట్ అధికారులు పట్టుకున్నారు. ఎస్సై హరిప్రసాద్ రెడ్డి తెలిపిన వివరాల ప్రకారం.. సోమవారం నాగర్ కర్నూల్ జిల్లా తిమ్మాజిపేట మండలం బావాజీపల్లి నుంచి నేరెళ్లపల్లి వెళ్లే రోడ్డుపై ఓ ట్రాక్టర్ అనుమానాస్పదంగా కనిపించడంతో అధికారులు ఆపి, తనిఖీ చేశారు.
అందులో 130 రేషన్ బియ్యం బస్తాలను గుర్తించారు. ట్రాక్టర్ డ్రైవర్ నాగయ్యను ప్రశ్నించగా.. బావాజీపల్లి రేషన్ డీలర్ వెంకటస్వామికి చెందినవని చెప్పాడు. బియ్యాన్ని బ్లాక్ మార్కెట్లో అమ్మేందుకు తీసుకెళ్తున్నట్లు అధికారులు తేల్చారని, వారి ఫిర్యాదు మేరకు ట్రాక్టర్ను సీజ్చేసి, కేసు నమోదు చేసినట్లు ఎస్సై పేర్కొన్నారు. బియ్యాన్ని బిజినేపల్లి గోదాంకు తరలించినట్లు తెలిపారు.
