హైదరాబాద్: మధుమేహం వ్యాధి వల్ల కాలి సమస్యలతో బాధపడుతున్న రోగులకు మరింత మెరుగైన వైద్యం అందించేందుకు ఉస్మానియా ఆసుపత్రిలో డయాబెటిక్ ఫుట్ క్లినిక్ ను ప్రారంభించారు. ఆసుపత్రిలో నూతనంగా ఏర్పాటు చేసిన ఈ సెంటర్ ను గురువారం ఉస్మానియా ఆసుపత్రి సూపరింటెండెంట్ డాక్టర్ బి.నాగేందర్... ఉస్మానియా వైద్య కళాశాల ప్రిన్సిపాల్ డాక్టర్ శశికళ రెడ్డి, అడిషనల్ సూపరింటెండెంట్ డాక్టర్ బి.త్రివేణి, ఎండోక్రైనాలజీ విభాగాధిపతి డాక్టర్ రాకేష్ సహాయ్ తో కలిసి లాంఛనంగా ప్రారంభించారు. ఈ సందర్భంగా ఆసుపత్రి సూపరింటెండెంట్ డాక్టర్ బి.నాగేందర్ మాట్లాడుతూ... రోజు రోజుకు మధుమేహ వ్యాధి బారినపడే వారి సంఖ్య పెరుగుతుండడం ఆందోళన కలిగిస్తుందన్నారు. మధు మేహ వ్యాధి బారిన పడిన వారి కోసం ఈ క్లినిక్ ఏర్పాటు చేసినట్లు తెలిపారు. ఈ క్లినిక్ ద్వారా న్యూరోపతి, డాప్లర్ స్టడీ వంటి సేవలు రోగులకు లభిస్తాయని చెప్పారు. సరైన ఆరోగ్య నియమాలు పాటించడం ద్వారా డయాబెటీస్ ను సాధ్యమైనంత వరకు తగ్గించవచ్చన్నారు.
మరిన్ని వార్తల కోసం...
