- టీఆర్ఎస్ వర్సెస్ బీజేపీ
- ఎల్లారెడ్డిపేటలో మరింత ముదిరిన ఫేస్బుక్ పోస్ట్ గొడవ
- 23 మంది బీజేపీ నేతలను అరెస్ట్ చేసిన పోలీసులు
- టీఆర్ఎస్ నేత తోట ఆగయ్య ఇంటిపై దాడి చేశారంటూ కేసు
- గాయపడిన బీజేపీ నేతలను వేరే ఆస్పత్రికి మార్చిన పోలీసులు
- ఎక్కడకు తీసుకెళ్లారో చెప్పాలంటూ బీజేపీ నేతల డిమాండ్
- ఎల్లారెడ్డిపేటలో మంత్రి గంగుల, ఎమ్మెల్యేల ర్యాలీ, రాస్తారోకో
- బీజేపీ నేతలపై దాడులు తమకు పెద్ద విషయం కాదంటూ గంగుల వార్నింగ్
రాజన్నసిరిసిల్ల/ ఎల్లారెడ్డిపేట, వెలుగు: రాజన్న సిరిసిల్ల జిల్లా ఎల్లారెడ్డిపేటలో బీజేపీ, టీఆర్ఎస్ మధ్య గొడవ మరింత ముదిరింది. దాడులకు పాల్పడిన టీఆర్ఎస్ నేతలను వదిలేసి.. 23 మంది బీజేపీ కార్యకర్తలను పోలీసులు శనివారం అరెస్ట్ చేసి రిమాండ్కు తరలించారు. పరారీలో ఉన్న మరికొందరి కోసం గాలిస్తున్నారు. టీఆర్ఎస్ జిల్లా అధ్యక్షుడు తోట ఆగయ్య ఇంటి మీద దాడి చేశారంటూ వారిపై కేసు నమోదు చేశారు. టీఆర్ఎస్ నేతల దాడిలో గాయపడి సిరిసిల్ల సివిల్ ఆస్పత్రిలో చికిత్స పొందుతున్న బీజేపీ నేతలను పోలీసులు వేరే ఆస్పత్రికి తరలించారు. ఇటు బీజేపీకి వ్యతిరేకంగా మంత్రి గంగుల కమలాకర్ నేతృత్వంలోని టీఆర్ఎస్ శ్రేణులు ఎల్లారెడ్డి పేటలో రాస్తారోకో నిర్వహించారు. దీంతో సిరిసిల్ల జిల్లా కేంద్రంతో పాటు ఎల్లారెడ్డిపేటలో పోలీసులు భారీ బందోబస్తు ఏర్పాటు చేశారు. పదిర గ్రామానికి చెందిన సాయికుమార్ అనే వ్యక్తి కేరళలో ఉంటూ టీఆర్ఎస్కు వ్యతిరేకంగా ఫేస్బుక్లో పెట్టిన పోస్ట్ శుక్రవారం గొడవకు దారితీసింది. సాయికుమార్ ఇంటికెళ్లి అతడి తల్లిని టీఆర్ఎస్ నేతలు బెదిరించగా.. వారిపై పోలీసులకు ఫిర్యాదు చేసేందుకు వెళ్లిన బీజేపీ నేతలపై ఠాణాలోనే టీఆర్ఎస్ నేతలు దాడికి పాల్పడ్డారు. ఈ క్రమంలోనే బీజేపీ నేతలు టీఆర్ఎస్ జిల్లా అధ్యక్షుడు తోట ఆగయ్య ఇంటి వద్ద ఆందోళన చేసేందుకు వెళ్లిన సంగతి తెలిసిందే.
టీఆర్ఎస్ నేతల రాస్తారోకో
తోట ఆగయ్య ఇంటిపై దాడి చేశారంటూ టీఆర్ఎస్ కార్యకర్తలు శనివారం జిల్లావ్యాప్తంగా ఆందోళనలు చేశారు. మంత్రి గంగుల, ఎమ్మెల్యేలు రసమయి బాలకిషన్, సుంకె రవిశంకర్లు ఆగయ్యను పరామర్శించి మీడియాతో మాట్లాడారు. బీజేపీ రాష్ట్ర అధ్యక్షుడు సంజయ్, మాజీ ఎమ్మెల్యే కటకం మృత్యుంజయం, జిల్లా కార్యదర్శి రెడ్డిబోయిన గోపిలపై గంగుల మండిపడ్డారు. తాము తలచుకుంటే బీజేపీ నేతలపై దాడులు చేయడం పెద్ద విషయం కాదని హెచ్చరించారు. కానీ, దాడులు చేయడం తమ సంస్కృతి కాదని చెప్పారు. టీఆర్ఎస్ ముందు బీజేపీ బలం సరిపోదన్నారు. రాష్ట్రాన్ని బీజేపీ మరో బీహార్, యూపీలా మార్చేందుకు ప్రయత్నిస్తోందని మండిపడ్డారు. బీజేపీ నేతలు తుపాకులు, కర్రలు పట్టుకుని దాడులు చేస్తున్నారన్నారు. తర్వాత ఎల్లారెడ్డిపేటలో బైక్ ర్యాలీ తీశారు. సిరిసిల్ల–కామారెడ్డి రోడ్డుపై రాస్తారోకో చేశారు. ఎల్లారెడ్డిపేట ఠాణావైపు టీఆర్ఎస్ నేతలు దూసుకురావడంతో పోలీసులు అడ్డుకున్నారు. టీఆర్ఎస్ నేతల ఫిర్యాదుతో రెడ్డిబోయిన గోపి వెపన్ లైసెన్స్ను రద్దు చేస్తూ ఉత్తర్వులు జారీ చేశారు.
ప్రశ్నిస్తే కేసులు పెట్టించి జైలుకు పంపుతున్నరు: బీజేపీ
టీఆర్ఎస్ నేతల దాడి గురించి తెలిసి బాధితులను పరామర్శించేందుకు బీజేపీ నేతలు సిరిసిల్ల జిల్లాకు వెళ్లారు. మాజీ మంత్రి ఎ. చంద్రశేఖర్, శ్రీశైలం, సంగప్ప, కటకం మృత్యుంజయం, ఆవునూరి రమాకాంతరావులు.. సిరిసిల్ల హాస్పిటల్లో చికిత్స పొందుతున్న రామచంద్రం, ఏలేందర్లను పరామర్శించేందుకు వెళ్లారు. అప్పటికే పోలీసులు వారిని వేరే ఆస్పత్రికి తీసుకెళ్లారని తెలిసింది. పోలీసులు ఎలా తీసుకెళ్తారని బీజేపీ నేతలు ప్రశ్నించారు. ప్రశ్నించే వారిపై సర్కార్ అక్రమ కేసులు పెడుతోందని మాజీ మంత్రి చంద్రశేఖర్ మండిపడ్డారు. దాడులు చేసే సంస్కృతి బీజేపీకి లేదన్నారు. బీజేపీ నేతలపైనే టీఆర్ఎస్ వాళ్లు దాడులు చేస్తున్నారన్నారని, వారిని అరెస్ట్ చేయకుండా.. బీజేపీ నేతలను అరెస్ట్ చేశారన్నారు. పోలీసులు గులాబీ కండువాలేసుకుని డ్యూటీ చేసే పరిస్థితులున్నాయన్నారు. ఆస్పత్రి నుంచి తీసుకెళ్లిన వారిని ఎక్కడ పెట్టారో చెప్పాలని, లేదంటే కోర్టుకెళ్తామని హెచ్చరించారు. ఠాణాలో దాడికి పాల్పడిన తోట ఆగయ్యతో పాటు టీఆర్ఎస్ నాయకులను అరెస్ట్ చేయాలని, బీజేపీ నేతలపై పెట్టిన అక్రమ కేసులను ఎత్తేయాలని జిల్లా ఎస్పీ బీజేపీ నేతలు విజ్ఞప్తి చేశారు.
