హైదరాబాద్: గాజులరామారం పరిధిలోని చిత్తారమ్మ ఆలయం పక్కన ఉన్న అపార్ట్ మెంట్లో దొంగతనం జరిగింది. సద్గున్(33) అనే వ్యక్తి తన యాక్టివా స్కూటీని OLXలో అమ్మకానికి పెట్టాడు. OLX యాడ్ చూసి సద్గున్ ఉంటున్న అపార్ట్ మెంట్కు ఒకతను వెతుక్కుంటూ వెళ్లాడు. అపార్ట్ మెంట్ కిందనే ఉండి సద్గుణ్కు కాల్ చేశాడు. స్కూటీ కీస్ తీసుకుని సెల్లార్లో ఉన్న పార్కింగ్ ప్లేస్ దగ్గరకు సద్గుణ్ వెళ్లాడు. ఆ వచ్చిన వ్యక్తి సద్గుణ్తో కాసేపు స్కూటీ కండీషన్ ఏంటని.. ఎంత చెప్తున్నారని బేరసారాలు చేశాడు. కచ్చితంగా స్కూటీ కొనే వ్యక్తిలా సద్గుణ్ను నమ్మించాడు. ట్రయల్ వేస్తానని చెప్పి సద్గుణ్ దగ్గర నుంచి స్కూటీ కీస్ తీసుకున్నాడు.
అపార్ట్ మెంట్ సెల్లార్ నుంచి స్కూటీ స్టార్ట్ చేశాడు. రయ్మని అక్కడ నుంచి వెళ్లిపోయాడు. గంటసేపైనా తన యాక్టివా తీసుకెళ్లిన వ్యక్తి తిరిగిరాకపోవడంతో మోసపోయానని గ్రహించిన సద్గుణ్ పోలీస్ స్టేషన్లో ఫిర్యాదు చేశాడు. నిందితుడి ఫోన్ నెంబర్ ఆధారంగా పోలీసులు సిగ్నల్ ట్రాక్ చేస్తున్నారు. బాధితుడి ఫిర్యాదుతో కేసు నమోదు చేసుకుని దర్యాప్తు చేస్తున్నారు.
హైదరాబాద్లో.. మరీ ముఖ్యంగా బాచుపల్లిలో ఇలాంటి ఘటనలు గతంలో కూడా జరిగాయి. 2025 జనవరిలో కూడా బాచుపల్లిలో ఇలాంటి ఘటనే జరిగింది. కౌసల్యా కాలనీకి చెందిన కె.మహేశ్ సాఫ్ట్వేర్ ఇంజినీర్గా పనిచేస్తున్నాడు. తన బైక్ అమ్ముతానని జనవరి 23న ఓఎల్ఎక్స్లో పోస్ట్ చేశాడు. ఇది చూసిన రమేశ్ బాబు.. మహేశ్ ఇంటికి వెళ్లి.. టెస్ట్ డ్రైవ్ చేస్తానని చెప్పి బైక్ తీసుకుని పారిపోయాడు. పోలీసులు దర్యాప్తు చేశారు.
చోరీ చేసిన బైక్పై తిరుగుతున్న రమేశ్ బాబు, గుండప్పను అదుపులోకి ప్రశ్నించగా.. నర్సింహతో కలిసి దొంగతనాలు చేసినట్లు ఒప్పుకున్నారు. వీరి నుంచి రూ.4 లక్షలు విలువ చేసే 6 బైక్లను స్వాధీనం చేసుకున్నారు. పరారీలో ఉన్న నర్సింహ కోసం వెతుకుతున్నారు. వీళ్లు బాచుపల్లి పరిధిలో3 బైక్లు, మియాపూర్, కేపీహెచ్బీ, జగద్గిరిగుట్ట పరిధిలో ఒక్కో బైక్ చోరీ చేసినట్లు పోలీసులు తెలిపారు.
