అనిఖా సురేంద్రన్.. అంటే అందరికీ తెలియకపోవచ్చు. కానీ, ‘చిన్నారి తల్లీ... చిన్నారి తల్లీ...’ పాటలో అజిత్ కూతురిగా నటించిన పాప అంటే మాత్రం వెంటనే గుర్తుకొస్తుంది. తమిళ డబ్బింగ్ సినిమాలు ‘ఎంతవాడు గానీ’, ‘విశ్వాసం’ వంటి బ్లాక్బస్టర్ సినిమాల్లో తండ్రీకూతుళ్ల సెంటిమెంట్తో ఆడియెన్స్ని ఫిదా చేసింది.. బేబీ అనిఖ. ఇప్పటికే కోలివుడ్, మాలీవుడ్ ఇండస్ట్రీల్లో నటించి అవార్డులు కూడా సొంతం చేసుకుంది. కెరీర్ బిగినింగ్ నుంచే పెద్ద పెద్ద స్టార్స్తో నటించింది. తన నటనతో మెస్మరైజ్ చేసి తెలుగు, తమిళ, మలయాళ ఇండస్ట్రీల్లో ఫ్యాన్స్ని సంపాదించుకుంది.ఈ మలయాళీ క్యూట్ గర్ల్ పర్సనల్ లైఫ్, ఫ్యామిలీ బ్యాక్గ్రౌండ్ గురించి...
అనిఖా సురేంద్రన్... 2004, నవంబర్ 27న పుట్టింది. కేరళలోని మలప్పురం జిల్లాలో ఉన్న మంజేరి ఆమె సొంతూరు. అనిఖ వాళ్ల అమ్మ ఉష, నాన్న సురేంద్రన్, అన్న అంకిత్. మిడిల్ క్లాస్ ఫ్యామిలీలో పుట్టిన అనిఖకి సినిమా బ్యాక్గ్రౌండ్ అస్సలు లేదు. ఎందుకంటే వాళ్ల నాన్న బిజినెస్ చేస్తాడు. అమ్మ హోమ్ మేకర్. అనిఖ వాళ్ల అన్న ఇప్పుడు ఆమె సోషల్ మీడియా అకౌంట్స్, రాబోయే సినిమాల షెడ్యూల్స్ చూసుకుంటున్నాడు. యాక్టింగ్, మోడలింగ్ అంటే అనిఖకి ఉన్న ఇష్టం. అందుకే చిన్నప్పుడే ఇండస్ట్రీలో అడుగుపెట్టింది. ధనుష్, రానా, నయనతార, కత్రినా కైఫ్లంటే చాలా ఇష్టం అంటున్న అనిఖ, ఆరేళ్ల వయసులోనే తన సినిమా కెరీర్ని స్టార్ట్ చేసింది. దానికంటే ముందు 2007లో మూడేళ్ల వయసులో మోహన్లాల్ నటించిన మలయాళం సినిమా ‘చోటా ముంబై’తో మొదటిసారి వెండితెరపై కనిపించింది. ప్రస్తుతం కొచ్చిలో ఉన్న ‘కేరళ స్టెడ్స్ ఐటి అకాడమీ’లో అండర్ గ్రాడ్యుయేషన్ చదువుతోంది.
ఆరేళ్ల వయసులోనే కెరీర్ స్టార్ట్
2010లో మలయాళం సినిమా ‘కధ తుడరున్ను’ అనే సినిమాలో చైల్డ్ ఆర్టిస్ట్గా చేసింది. అదే తన మొదటి సినిమా అని చెప్పొచ్చు. ఆ సినిమాలో అనిఖ పాత్రకి మంచి పేరొచ్చింది. అప్పటి నుంచి ఈ ఏడాది వరకు వరుస సినిమాలు చేసింది. ప్రతి ఏడాది మలయాళం లేదా తమిళంలో ఒక్క సినిమాలో అయినా కనిపిస్తోంది. సినిమాలతో పాటు అప్పుడప్పుడు వెబ్ సిరీస్లు, షార్ట్ ఫిల్మ్స్ కూడా చేస్తుంటుంది అనిఖ. ‘ఎంతవాడు గానీ’(ఎన్నై అరింధాల్), ‘విశ్వాసం’ సినిమాల్లో అజిత్ కూతురి పాత్రలో నటించి మెప్పించింది. ఈ రెండు సినిమాల్లో వీళ్లిద్దరి మీదే ఎక్కువ సీన్స్, స్పెషల్ సాంగ్స్ ఉన్నాయి. ఈ సినిమాలతోనే తెలుగు వాళ్లకు కూడా పరిచయమైంది. సినిమాలే కాకుండా, ‘క్వీన్’ వెబ్ సిరీస్లో కూడా నటించింది. రమ్యకృష్ణ లీడ్ రోల్ చేసిన ఈ వెబ్ సిరీస్లో ‘శక్తి శేషాద్రి’ స్కూల్లో ఉన్నప్పటి రోల్లో నటించింది. ఆమె నటించిన మొదటి వెబ్ సిరీస్ కూడా ఇదే. ఇప్పటికే మమ్ముట్టి, దుల్కర్ సల్మాన్, జయం రవి, విజయ్ సేతుపతి వంటి తమిళ, మలయాళ స్టార్ యాక్టర్స్తో స్క్రీన్ షేర్ చేసుకుంది. మలయాళీ అమ్మాయి అయినా బాలీవుడ్ మూవీస్ అంటే చాలా ఇష్టమట అనిఖకి. వాటిలోనూ షారుఖ్ ఖాన్ సినిమాలంటే కాస్తంత ఎక్కువ ఇష్టం. తనకి ఇష్టమైన ప్లేస్ ముంబై.
టాలీవుడ్లో కూడా...
డబ్బింగ్ సినిమాలతో తెలుగు తెరకు పరిచయమైన ఈ మలయాళ కుట్టి త్వరలోనే డైరక్ట్ తెలుగు సినిమాలు చేయబోతోంది. మలయాళంలో సూపర్ హిట్ అయిన రొమాంటిక్ థ్రిల్లర్ ‘‘కప్పేల’’ తెలుగులో ‘‘బుట్ట బొమ్మ”గా రీమేక్ చేస్తున్నారు. ఇందులో అనిఖ హీరోయిన్గా సెలక్ట్ అయ్యింది. ఈ మూవీని సితార ఎంటర్టైన్మెంట్స్ బ్యానర్పై నిర్మిస్తున్నారు. అలాగే నాగార్జున, కాజల్ అగర్వాల్ కలిసి నటిస్తున్న యాక్షన్ థ్రిల్లర్ సినిమాలో కూడా అనిఖ ఒక ఇంపార్టెంట్ రోల్ చేయబోతోంది. ప్రస్తుతం హైదరాబాద్లో షూటింగ్
జరుపుకుంటున్న ఈ సినిమాను ప్రవీణ్ సత్తారు డైరక్ట్ చేస్తున్నాడు. అంటే మరో మలయాళీ నటి టాలీవుడ్ సిల్వర్ స్ర్కీన్పై తెలుగు ఆడియెన్స్కు దగ్గరవబోతోంది. సోషల్ మీడియాలో యాక్టివ్గా ఉండే అనిఖ, ఇన్స్టాగ్రామ్, ఫేస్బుక్లలో తన లేటెస్ట్ అప్డేట్స్, ఫొటోలను ఎప్పటికప్పుడు పోస్ట్ చేస్తుంటుంది.
అవార్డ్స్
13వ ‘ఏషియానెట్ ఫిల్మ్ అవార్డ్స్’ 2010లో బెస్ట్ చైల్డ్ ఆర్టిస్ట్ అవార్డ్, 2013లో ‘కేరళ స్టేట్ ఫిల్మ్ అవార్డ్’లు అందుకుంది. 2015లో వచ్చిన ‘నయన’ అనే మలయాళ సినిమాలో చైల్డ్ ఆర్టిస్ట్గా, టైటిల్ రోల్లో నటించింది. ఇందులో ప్రముఖ బాలీవుడ్ నటుడు అనుపమ్ ఖేర్ నటించాడు. 2015లో -బెస్ట్ చైల్డ్ ఆర్టిస్ట్గా ‘11వ రాము కర్యత్ అవార్డ్’, 2017లో ‘వయలార్ అవార్డ్’లను సొంతం చేసుకుంది బేబీ అనిఖ.
