నిజామాబాద్, వెలుగు: కాంగ్రెస్ అంటే సామాజిక బాధ్యతకు కాంగ్రెస్ ప్రాధాన్యం ఇస్తుందని, డీసీసీ ప్రెసిడెంట్ నియామకానికి ఏఐసీసీ పంపిన అబ్జర్వర్, కర్ణాటక ఎమ్మెల్యే రిజ్వాన్ అర్షద్ అన్నారు. సోమవారం నిజామాబాద్లోని ఓ హోటల్లో మీడియాతో మాట్లాడారు. నాయకులు, కార్యకర్తలకు ఆమోదయోగ్యమైన నేతకు డీసీసీ పోస్టు అప్పగిస్తామన్నారు. పదవి కోసం జిల్లాలో చాలా మంది నాయకులు పోటీ పడుతున్నారని, కనీసం ఐదేండ్లు కాంగ్రెస్తో ఉన్న అనుబంధం ఇతరాత్రా అంశాలను పరిగణనలోకి తీసుకొని హైకమాండ్కు పేర్లు నివేదిస్తామన్నారు.
కేంద్రంలో కాంగ్రెస్ను అధికారంలోకి తేవడంతో పాటు రాష్ట్రంలో రెండోసారి పవర్లోకి వచ్చేలా డీసీసీ పని చేయాల్సి ఉంటుందన్నారు. ఇందుకోసం సమర్థుడిని ఎంపిక చేస్తామని,అసెంబ్లీ సెగ్మెంట్ వారిగా మీటింగ్ నిర్వహిస్తామన్నారు. కాంగ్రెస్లో మంత్రులు, లీడర్లు, కార్యకర్తలు అంతా కుటుంబంగా ఉంటామన్నారు. ఎమ్మెల్సీ బల్మూరి వెంకట్, ఎమ్మెల్యేలు సుదర్శన్రెడ్డి, డాక్టర్ భూపతిరెడ్డి. మాజీ ఎమ్మెల్సీ అరికెల నర్సారెడ్డి, మాజీ ఎమ్మెల్యేలు అరేపల్లి మోహన్, ఏనుగు రవీందర్రెడ్డి, కార్పొరేషన్ చైర్మన్లు మానాల మోహన్రెడ్డి, తాహెర్, అగ్రికల్చర్ కమిషన్ సభ్యుడు గడుగు గంగాధర్, నుడా చైర్మన్ కేశవేణు ఉన్నారు.
