షాదీ ముబారక్ రాకుంటే.. నేనేం చేయాలె
మహిళపై ప్రభుత్వ విప్ సునీత అసహనం
యాదాద్రి, వెలుగు : తనకు షాదీ ముబారక్ రాలేదని ఓ మహిళ అడగడంతో ప్రభుత్వ విప్, ఆలేరు ఎమ్మెల్యే గొంగిడి సునీత తీవ్ర అసహనానికి గురయ్యారు. యాదాద్రి జిల్లా ఆలేరు నియోజకవర్గం ఆత్మకూర్(ఎం)లో 48 డబుల్ బెడ్రూం ఇండ్లు నిర్మించగా 193 మంది అప్లికేషన్‌ పెట్టుకున్నారు. వీరిలో 98 మందిని అర్హులుగా గుర్తించి డ్రా తీసి 48 మందిని ఎంపిక చేశారు. లబ్ధిదారుల గృహప్రవేశం కోసం నిర్వహించిన కార్యక్రమంలో బుధవారం గొంగిడి సునీత పాల్గొన్నారు.
ఈ సందర్భంగా వేదికపైకి వచ్చిన మహిళ ‘నాకు డబుల్బెడ్రూం ఇల్లు రావడం ఆనందంగా ఉంది. కానీ షాదీ ముబారక్ రాలేదు’ అని చెప్పారు. దీంతో అసహనానికి గురైన గొంగిడి సునీత అయితే ‘నేనేం చేయాలె’ అన్నారు. అయినప్పటికీ ఆ మహిళ తన చేతిలో ఉన్న శాలువాను ఎమ్మెల్యేకు కప్పబోయారు. అప్పటికే అసహనంతో ఉన్న సునీత శాలువా కప్పుకోకుండా.. ఆమెను తోసుకుంటూ వెళ్లిపోయారు.
