ఎక్కడైనా ఏదైనా హత్య జరిగితే దానికి మనుషులో, ఫోటోలో లేకపోతే వీడియోలో సాక్ష్యాలుగా నిలుస్తాయి.. కానీ, ఇక్కడ మాత్రం ఊహించని విధంగా ఒక ఎలక్ట్రానిక్ వస్తువు సాక్ష్యంగా మారింది. ఆ సంఘటన ఫ్లోరిడాలోని హలాండేల్ బీచ్‌లో చోటుచేసుకుంది.
ఫ్లోరిడాలో ఆడమ్ క్రెస్పో, సిల్వియా గాల్వా క్రెస్పో అనే దంపతులు నివసిస్తున్నారు. వారిరువురు జూలై నెలలో ఒకరోజు రాత్రి ఏదో ఒక విషయమై వాదించుకొని గొడవపడ్డారు. ఆ గొడవలో ఆడమ్ తన భార్యను ఒక ఈటేతో పొడిచాడు. దాంతో అతని భార్య సిల్వియా తీవ్ర రక్తస్రావం జరిగి మరణించింది. దాంతో ఆడమ్‌పై సెకండ్ డిగ్రీ కేసు నమోదైంది, కానీ ఆడమ్ మాత్రం తన భార్యను హత్య చేసినట్లుగా ఒప్పుకోవడంలేదు, ఎందుకంటే ఆ హత్యను చూసినవాళ్లేవరూ లేరు.
అయితే ఈ కేసును విచారిస్తున్న పోలీసులకు అనూహ్యంగా ఓ ఆలోచన తట్టింది. అదేంటంటే ఆడమ్ ఇంట్లో అమెజాన్ ఎకో డివైజ్‌ను పోలీసులు గుర్తించారు. ఈ హత్యకు సంబంధించిన ఏదైనా సమాచారం ఆ బ్లూటూత్ డివైజ్‌లో లభిస్తుందేమోనని ఆలోచన వచ్చింది.
పోలీసులకు అసలు ఆ ఆలోచన రావడానికి కారణం ఏంటంటే.. అమెజాన్ అలెక్సా డివైజ్‌లు ‘వేక్’ అనే ఊతపదంతో కూడా యాక్టివేట్ అవుతాయి. అందువల్ల హత్య జరిగిన సమయంలో ఈ డివైజ్ అక్కడే ఉండటంతో, హత్యకు సంబంధించి ఏదో ఒక క్లూ అందులో రికార్డు అయి ఉండవచ్చని పోలీసులు భావిస్తున్నారు. అందుకే అనుకున్నదే తడవుగా పోలీసులు ఆ డివైజ్‌ను పరిశీలించగా అందులో కొన్ని మాటలు రికార్డ్ అయినట్లుగా గుర్తించారు. దాంతో ఆ డివైజ్‌లోని మాటలను విశ్లేషించడానికి ఆ డివైజ్‌ని పరిశీలనకు పంపించారు.
అయితే ఈ హత్యకు సంబంధించి ఆడమ్ మాత్రం ఈ విధంగా చెబుతున్నాడు. తాను, తన భార్య గొడవపడినప్పుడు అనుకోకుండా 12 ఇంచుల బ్లేడ్ సిల్వియా ఛాతీ భాగంలో గుచ్చుకుందని, అప్పుడు తాను ఆ బ్లేడ్‌ను బయటకి తీయడానికి ప్రయత్నించానని చెప్పాడు. అయితే ఆ గాయంతో సిల్వియా తీవ్రంగా గాయపడుతుందని తాను అనుకోలేదని ఆడమ్ చెప్పాడు. కాగా పోలీసులు మాత్రం ఆ గాయం కారణంగానే సిల్వియాకు తీవ్ర రక్తస్రావం జరిగినట్లు గుర్తించారు. అయితే సిల్వియా ఛాతీ నుంచి ఆ ఈటేను ఆడమ్ బయటకు తీశాడా లేక ఆమె స్నేహితురాలు తీసిందా అనేది మాత్రం పోలీసులు గుర్తించలేకపోయారు.
ఏది ఏమైనా హత్యానేరం కింద అరెస్టయిన ఆడమ్ మాత్రం తాను ఈ హత్య చేయలేదని వాదిస్తున్నాడు. కాగా, కోర్టు ఆడమ్‌ని 65,000 డాలర్ల పూచికత్తుతో విడుదలచేసింది. అయితే ఆడమ్ ఈ హత్య చేశాడా లేదా అనే విషయం తేలాలంటే మాత్రం అలెక్సా డివైజ్‌లో రికార్డయిన మాటలే ఈ హత్యకు కీలకం.
