అది అమెరికాలోని ఫ్లోరిడా. అక్కడ ఒక ఫేమస్ ఫాస్ట్ ఫుడ్ రెస్టారెంట్ ఉంది. వెండీ దాని పేరు. ఆ ఫేమస్ రెస్టారెంట్ను ఇంకా ఫేమస్ చేయాలనుకున్నాడో ఏమోగానీ.. ఆ రెస్టారెంట్ ఉద్యోగి ఒకడు కిచెన్లోని సింక్లో స్నానం చేశాడు. చేయడం కాదు, తాను చేసింది అంత ఘనకార్యమనుకున్నాడు కావొచ్చు.. ఫోన్లో వీడియో కూడా తీశాడు. పక్కనే ఉన్న ఇతర ఉద్యోగులు ఆ పనిని ఆపాల్సింది పోయి ఇంకా రెచ్చగొట్టారు. ఫకఫకమని నవ్వారు.
మరి, ఆ వీడియోను అతడే పోస్ట్ చేశాడో, ఉద్యోగుల్లో ఇంకెవరైనా పోస్ట్ చేశారో కానీ, ఆ వీడియో ఫేస్బుక్లో వైరల్ అయింది. ఒక్క వారంలోనే పది లక్షల మందికిపైగా ఆ వీడియోను చూశారు. ఆ రెస్టారెంట్కు వెళ్లే చాలా మంది బహిరంగంగా వెండీపై విమర్శలు కురిపించారు. ఫేమస్ అనుకుంటే ఇలాగా చేసేదంటూ యాజమాన్యంపై మండిపడ్డారు. దీంతో గత్యంతరం లేక ఆ రెస్టారెంట్ ఓనర్ మీడియా సమక్షంలో వివరణ ఇచ్చారు. అతడిని ఉద్యోగం నుంచి పీకేసినట్టు చెప్పారు. ఇలాంటి వాటిని క్షమించబోమన్నారు.