వాషింగ్టన్‌: హిందూ దేవుళ్లను కించపరుస్తూ అమెరికాలోని అధికార పార్టీ రిపబ్లికన్ నేత అలెగ్జాండర్ డంకన్‌ వివాదాస్పద వ్యాఖ్యలు చేశారు. టెక్సస్లోని షుగర్ ల్యాండ్ టౌన్లో నిర్మించిన భారీ హనుమంతుడి విగ్రహంపై ఆయన అభ్యంతరం వ్యక్తం చేశారు. ‘‘మనది క్రైస్తవ దేశం. టెక్సస్లో ఒక నకిలీ హిందూ దేవుడి నకిలీ విగ్రహాన్ని మనం ఎందుకు అనుమతిస్తున్నాం?” అంటూ ‘ఎక్స్‌’లో పోస్టు చేశారు.
మరో పోస్టులో ‘‘మీకు నేను తప్ప మరో దేవుడు లేడు. మీరు మరే విగ్రహాన్ని, చిత్రాన్ని పూజించవద్దు’ అంటూ బైబిల్లోని వాక్యాలను ఉటంకించారు. ఈ పోస్టులకు హనుమంతుడి విగ్రహం వీడియోను జత చేశారు. ఈ వ్యాఖ్యలపై పెద్ద ఎత్తున దుమారం రేగింది. ఆయన హిందూ వ్యతిరేక, రెచ్చగొట్టే వ్యాఖ్యలు చేస్తున్నారని హిందూ అమెరికన్ ఫౌండేషన్ ఆగ్రహం వ్యక్తం చేసింది. డంకన్పై చర్యలు తీసుకోవాలని రిపబ్లికన్ పార్టీ నాయకత్వానికి ఫిర్యాదు చేసింది.
