మావోయిస్టులకు కొత్త డెడ్ లైన్ పెట్టారు కేంద్ర హోంమంత్రి అమిత్ షా.. వచ్చే డీజీపీ, ఐజీపీల సమావేశం వరకు దేశంలో నక్సలిజం లేకుండా చేస్తామని వార్నింగ్ ఇచ్చారు. నక్సలిజాన్ని నిర్మూలనకు భద్రతా గ్రిడ్ ను బలోపేతం చేశాం.. గడిచిన ఏడేళ్లలో దేశంలో నక్సల్ ప్రభావం ఊహించని విధంగా తగ్గిందన్నారు. నక్సలిజం, ఈశాన్య, జమ్మూ కాశ్మీర్ వంటి దీర్ఘకాలిక సమస్యలపై మోదీ ప్రభుత్వం దృష్టి పెట్టి శాశ్వత పరిష్కారం అందిస్తుందన్నారు. ఈ ప్రాంతాలు త్వరలో దేశంలోని మిగిలిన ప్రాంతాల మాదిరిగానే సాధారణంగా మారిపోతాయని అమిత్ షా స్పష్టం చేశారు.
ఛత్తీస్‌గఢ్‌లోని రాయ్‌పూర్‌లో మూడు రోజుల పాటు జరిగే 60వ డీజీపీ, ఐజీపీ సమావేశాల ప్రారంభోత్సవంలో మాట్లాడిన అమిత్ షా శుక్రవారం ఈ వ్యాఖ్యలు చేశారు. గడిచిన ఏడేళ్లలో నక్సలిజం నిర్మూలనకు కేంద్ర పటిష్టమైన భద్రతను గ్రిడ్ బలోపేతం చేసిందన్నారు. ఫలితంగా 2014లో 126గా ఉన్న నక్సల్స్ ప్రభావిత జిల్లాలు ఇప్పుడు కేవలం 11కి చేరిందన్నారు. తదుపరి అఖిల భారత డైరెక్టర్ జనరల్ ,ఇన్‌స్పెక్టర్ జనరల్ ఆఫ్ పోలీస్ సమావేశానికి ముందే నక్సలిజం నిర్మూలిస్తామని అమిత్ షా ప్రతిజ్ణ చేశారు.
రాష్ట్ర పోలీసు దళాలు నార్కోటిక్స్ కంట్రోల్ బ్యూరోతో కలిసి పనిచేయాలని , రాష్ట్ర, జాతీయ ,అంతర్జాతీయ స్థాయిలో డ్రగ్స్ నెట్‌వర్క్‌లను కఠినంగా అణచివేయాలని బాధ్యులను చట్టం ముందు నిలబెట్టాలని అమిత్ షా కోరారు.
నక్సలిజం, ఈశాన్య, జమ్మూ కాశ్మీర్ అనే మూడు దీర్ఘకాలిక హాట్‌స్పాట్‌లకు మోడీ ప్రభుత్వం శాశ్వత పరిష్కారాలను అందించిందని, ఈ ప్రాంతాలు త్వరలో దేశంలోని మిగిలిన ప్రాంతాల మాదిరిగానే ఉంటాయని షా సమావేశంలో అన్నారు.
తీవ్రవాదం, నక్సలిజం, డ్రగ్స్ పై నిఘా పెట్టి ఖచ్చితమైన లక్ష్యంతో దాడులు చేస్తున్నారని అభినందించారు. డ్రగ్స్, వ్యవస్థీకృత నేరాలకు వ్యతిరేకంగా ముప్పేట దాడులు చేయాలని పిలుపునిచ్చారు అమిత్ షా.
మార్చి31, 2026 వరకు దేశంలో మావోయిస్టులు లేకుండా చేస్తామని కేంద్ర హోంశాఖ మంత్రి శపథం చేశారు.
ఇటీవల జరిగిన అనేక ఎన్ కౌంటర్లలో అనేక మంది మావోయిస్టు కీలక నేతలు చనిపోయారు. వందలాది మంది మావోయిస్టులు లొంగిపోయారు. తాజాగా మావోయిస్టులం మొత్తం ఒకేసారి లొంగిపోతామని జనవరి 1న డేట్ ఫిక్స్ చేస్తూ మావోయిస్టులు ఓ లేఖ కూడా విడుదల చేశారు. ఈ క్రమంలో హోంశాఖ మంత్రి అమిత్ షా వ్యాఖ్యలు చర్చనీయాంశమయ్యాయి.
