కాఠ్మాండు: నేపాల్ రాజధాని కాఠ్మాండులో భూకంపం సంభవించింది. రిక్టర్ స్కేల్పై తీవ్రత 6.1 పాయింట్లుగా నమోదైంది. అరగంటలో నాలుగుసార్లు భూమి కంపించడంతో జనం ఆందోళనకు గురయ్యారు. ఇండ్ల నుంచి బయటకు పరుగులు పెట్టారు. ఆదివారం ఉదయం 7:39 గంటలకు భూకంపం సంభవించిందని, ఆ తర్వాత మరో మూడుసార్లు భూమి కంపించిందని అధికారులు తెలిపారు.
భూప్రకంపనల తీవ్రత రిక్టర్ స్కేల్ పై వరుసగా 4.3. 4.3, 4.1గా నమోదైందని చెప్పారు. ధాడింగ్ జిల్లాలో భూకంప కేంద్రం ఉందని.. బాగ్మతి, గండకీ ప్రావిన్సులలోనూ ప్రకంపనలు వచ్చాయన్నారు. ‘‘భూకంపం వల్ల 20 ఇండ్లు దెబ్బతిన్నాయి. మరో 75 ఇండ్లకు పైగా పగుళ్లు వచ్చాయి. కొన్నిచోట్ల కొండచరియలు విరిగిపడ్డాయి. అదృష్టవశాత్తూ ఎవరూ చనిపోలేదు” అని అధికారులు వెల్లడించారు.
