తూర్పు రాయలసీమ ఉపాధ్యాయ ఎమ్మెల్సీ పర్వతరెడ్డి చంద్రశేఖరరెడ్డి ప్రయాణిస్తున్న కారు రోడ్డు ప్రమాదానికి గురైంది. కారు టైరు పంక్చర్ కావడంతో అదుపుతప్పి ముందు వెళ్తున్న లారీ వెనుక భాగాన్ని ఢీకొంది. ఈ ప్రమాద ఘటనలో చంద్రశేఖర్‌రెడ్డి పీఏ అక్కడికక్కడే మృతి చెందగా.. ఎమ్మెల్సీ తలకు తీవ్ర గాయాలయ్యాయి. నెల్లూరు జిల్లా కొడవలూరు మండలం రేగడిచెలిక సమీపంలో గురువారం అర్ధరాత్రి ఈ ప్రమాదం చోటుచేసుకుంది.
ప్రమాద సమయంలో కారులో ఐదుగురు ఉన్నట్లు సమాచారం. విజయవాడ నుంచి నెల్లూరు వస్తుండగా ఈ దుర్ఘటన జరిగినట్లు తెలుస్తోంది. సకాలంలో స్తానికులు స్పందించి క్షతగాత్రులను నెల్లూరులోని అపోలో ఆసుపత్రికి తరలించారు. కాగా, కొద్ది రోజుల క్రితం పశ్చిమగోదావరి జిల్లా మృతి చెందిన ఉపాధ్యాయ నియోజకవర్గాల పీడీఎఫ్ ఎమ్మెల్సీ షేక్‌ సాబ్జీ రోడ్డు ప్రమాదంలో మరణించిన విషయం తెలిసిందే.
