ఇంఫాల్: మణిపూర్ లో శాంతిని నెలకొల్పేందుకు శ్రమిస్తున్న అస్సాం రైఫిల్స్ ప్రతిష్టను దెబ్బతీసేందుకు ప్రయత్నాలు జరుగుతున్నాయని ఆర్మీ పేర్కొంది. రాష్ట్రంలో హింసాత్మక ఘటనలు జరగకుండా కఠిన చర్యలు కొనసాగిస్తామని తెలిపింది. ఈ మేరకు ఆర్మీ స్పియర్ కార్ప్స్ ట్విట్టర్ లో పోస్టు పెట్టింది. ‘‘మణిపూర్ లో శాంతి నెలకొల్పేందుకు మే 3 నుంచి నిరంతరాయంగా పని చేస్తున్న కేంద్ర బలగాలు, ముఖ్యంగా అస్సాం రైఫిల్స్ ప్రతిష్టను దెబ్బతీసే ప్రయత్నాలు జరుగుతున్నాయి.
మణిపూర్లో ఉన్న పరిస్థితుల దృష్ట్యా అక్కడ పని చేస్తున్న భద్రతా బలగాల మధ్య విభేదాలు వస్తుంటాయి. వాటిని పరిష్కరించుకుంటూ ముందుకెళ్తున్నాం. రాష్ట్రంలో హింసను ఆపేందుకు ప్రయత్నిస్తున్నాం” అని పేర్కొంది. హెడ్ క్వార్టర్స్ ఆదేశాలతోనే బఫర్ జోన్ రూల్స్ను అస్సాం రైఫిల్స్ కఠినంగా అమలు చేసిందని తెలిపింది. కాగా, స్థానికుల ఆందోళనతో బిష్ణుపూర్ నుంచి అస్సాం రైఫిల్స్ను ప్రభుత్వం ఉపసంహరించింది. ఆ తర్వాత కొద్దిసేపటికే అస్సాం రైఫిల్స్ పై పోలీసులు కేసు పెట్టారు.
