- ప్రభుత్వ నిర్ణయాల మీద విచారణపై సుప్రీం
- వాదనలు విని సమాధానం ఇవ్వడం మా బాధ్యత
- ఐదుగురు జడ్జీల ధర్మాసనం వెల్లడి
న్యూఢిల్లీ: ప్రభుత్వ విధానపరమైన నిర్ణయాలపై న్యాయ సమీక్ష విషయంలో ‘లక్ష్మణ రేఖ’ ఉన్నట్లు తెలుసని, అయినప్పటికీ పెద్ద నోట్ల రద్దు నిర్ణయంపై విచారణ చేపట్టాల్సిన బాధ్యత తమకుందని సుప్రీం కోర్టు చెప్పింది. ఈమేరకు జస్టిస్ ఎస్ఏ నజీర్ ఆధ్వర్యంలోని ఐదుగురు జడ్జీల బెంచ్ బుధవారం ఈ కామెంట్ చేసింది. పెద్దనోట్ల రద్దును సవాల్ చేస్తూ దాఖలైన పిటిషన్లపై సుప్రీం కోర్టు బుధవారం నుంచి విచారణ ప్రారంభించింది. ‘‘కాన్స్టిట్యూషన్ బెంచ్ ముందు ఏ అంశం వచ్చినా.. దానిపై విచారించి సమాధానం ఇవ్వడం మా డ్యూటీ. 2016లో కేంద్ర ప్రభుత్వం పెద్దనోట్లను రద్దు చేసింది. అయితే, ఈ నిర్ణయం పాలనాపరమైన అంశమా..? లేదా..? అనేది కూడా పరిశీలిస్తాం. జ్యూడిషియల్ ఎంక్వైరీలో మా పరిధి(లక్ష్మణరేఖ) మాకు తెలుసు. ఇరు పక్షాల వాదనలు విన్న తర్వాతే మా నిర్ణయమేంటో ప్రకటిస్తాం”అని జస్టిస్ ఎస్ఏ నజీర్, జస్టిస్ బీఆర్ గవాయి, జస్టిస్ ఏఎస్ బోపన్న, జస్టిస్ వి.రామసుబ్రమణియన్, జస్టిస్ బీవీ నాగరత్నతో కూడిన ధర్మాసనం తెలిపింది. ‘‘మా ముందు ఉన్న సమస్య, అకడమిక్ నా..? నాన్ అకడమిక్ నా..? పరిశీలిస్తాం. న్యాయ సమీక్ష పరిధి దాటుతుందా..? అనేది కూడా చూస్తాం”అని బెంచ్ వివరించింది.
కోర్టు టైం వేస్ట్ చేయొద్దు: ఎస్జీ తుషార్ మెహతా
అకడమిక్ అంశాలపై విచారణ చేపట్టి కోర్టు టైం వేస్ట్ చేయొద్దని ప్రభుత్వం తరఫున సొలిసిటర్ జనరల్ తుషార్ మెహతా ధర్మాసనానికి విన్నవించారు. దీనిపై పిటిషనర్ వివేక్ నారాయణ్ శర్మ తరఫు సీనియర్ అడ్వొకేట్ శ్యాం దివాన్ స్పందించారు. తుషార్ మెహతా వాదనలను ఖండిస్తున్నట్టు చెప్పారు. గతంలో ఈ పిటిషన్లను కింది స్థాయి బెంచ్ విచారించిందని, దీనిపై సరైన నిర్ణయం తీసుకోవాలంటే రాజ్యాంగ ధర్మాసనం విచారించాలని పేర్కొన్న విషయాన్ని శ్యాం దివాన్ కోర్టుకు గుర్తుచేశారు. ఈ సమస్య అకడమిక్ అవునో కాదో తేల్చాల్సింది కూడా సుప్రీంకోర్టేనని మరో పిటిషన్ తరఫు సీనియర్ అడ్వొకేట్ పి.చిదంబరం కోర్టుకు విన్నవించారు. నోట్ల రద్దుకు ప్రత్యేక చట్టం అవసరమని అభిప్రాయపడ్డారు. 2016, నవంబర్ 8న రూ.1000, రూ.500 నోట్లను రద్దు చేస్తున్నట్టు కేంద్రం ప్రకటించింది. దీన్ని సవాల్ చేస్తూ సుప్రీం కోర్టులో పిటిషన్లు దాఖలయ్యాయి. వాటన్నింటిని పరిశీలించిన అప్పటి చీఫ్ జస్టిస్ టీఎస్ ఠాకూర్, రాజ్యాంగ ధర్మాసనానికి ట్రాన్స్ఫర్ చేశారు.
