న్యూఢిల్లీ: తమిళనాడులో సీడీఎస్ జనరల్ బిపిన్ రావత్ ప్రయాణిస్తున్న హెలికాప్టర్ క్రాష్అయిన ఘటనపై దర్యాప్తు పూర్తయిందని, ఎయిర్ చీఫ్మార్షల్ వీఆర్ చౌధరికి మరో ఐదు రోజుల్లో నివేదిక అందనుందని ఆర్మీ వర్గాలు వెల్లడించాయి. డిసెంబర్ 8న తమిళనాడులోని నీలగిరి హిల్స్ లో ఆర్మీ హెలికాప్టర్ కూలిపోవడంతో జనరల్ రావత్, ఆయన భార్యతో సహా మొత్తం 14 మంది మరణించారు. ఈ ఘటనపై దర్యాప్తు, నివేదికకు సంబంధించి ఇప్పటివరకు అటు ప్రభుత్వం గానీ, ఇటు ఎయిర్ ఫోర్స్ గానీ ఎలాంటి ప్రకటన విడుదల చేయలేదు. అయితే ఆ రోజు వాతావరణం బాగలేకపోవడంతో దట్టమైన పొగమంచు కారణంగా ముందు ఏమీ కనిపించని పరిస్థితి ఉందని, హెలికాప్టర్ క్రాష్కావడానికి ఇదే కారణం కావచ్చని ఆర్మీ వర్గాలు చెప్పాయి. బ్యాడ్ వెదర్ కారణంగానే అనుకోకుండా హెలికాప్టర్ చెట్లను ఢీకొట్టి క్రాష్అయి ఉండొచ్చని ఎయిర్ మార్షల్ మానవేంద్ర సింగ్ ఆధ్వర్యంలో జరిగిన కోర్ట్ ఆఫ్ ఎంక్వైరీలో ఒక నిర్ణయానికి వచ్చారని చెప్తున్నారు. హెలికాప్టర్ లో టెక్నికల్, మెకానికల్ డిఫెక్ట్స్ కు ఎలాంటి అవకాశం లేదని వారు స్పష్టం చేస్తున్నారు.
