హైదరాబాద్ : సికింద్రాబాద్ రైల్వేస్టేషన్ లో అక్టోబర్ 24న చోరీకి గురైన సీఆర్పీఎఫ్ కానిస్టేబుళ్ల బ్యాగు దొరికింది. వారి బ్యాగులో ఉన్న బుల్లెట్లు కూడా లభించాయి. దీంతో బాధిత పోలీసులు ఊపిరి పీల్చుకున్నారు. ఈ కేసులో నిందితుడిని అరెస్ట్ చేశారు.
అసలేం జరిగిందంటే...?
నలుగురు సీఆర్పీఎఫ్ కానిస్టేబుళ్లు బెనారస్ వెళ్లేందుకు అక్టోబర్ 24న సికింద్రాబాద్ రైల్వేస్టేషన్ కు వెళ్లారు. దానాపూర్ ఎక్స్ప్రెస్ రైలు కోసం ఎదురు చూస్తున్న కానిస్టేబుళ్లు.. కాసేపు సేద తీరారు. ఈ సమయంలోనే ఓ వ్యక్తి సీఆర్పీఎఫ్ కానిస్టేబుళ్ల బ్యాగును ఎత్తుకెళ్లాడు. చోరీకి గురైన బ్యాగులో మూడు మ్యాగజైన్లు, 60 బుల్లెట్లు ఉన్నాయి. ఇదే విషయాన్ని స్థానిక పోలీస్ స్టేషన్తో పాటు రైల్వే పోలీసులకు బాధిత పోలీసులు ఫిర్యాదు చేశారు. కేసు నమోదు చేసుకున్న పోలీసులు.. అన్ని కోణాల్లో దర్యాప్తు మొదలుపెట్టారు.
ఈ కేసును సీరియస్గా తీసుకున్న పోలీసులు.. ఎనిమిది బృందాలుగా ఏర్పడి నిందితుడి కోసం గాలింపు చర్యలు ముమ్మరం చేశారు. సీసీటీవీ కెమెరాలను జల్లెడ పట్టి.. నిందితుడిని సికింద్రాబాద్ గాంధీ ఆస్పత్రి మెట్రోస్టేషన్ వద్ద పట్టుకున్నారు. అయితే.. నిందితుడు చెప్పిన విషయాలు విని పోలీసులు కూడా షాక్ అయ్యారు. బ్యాగులో డబ్బులు ఉన్నాయనే ఉద్దేశంతో తాను చోరీ చేశానని, కానీ.. అందులో డబ్బులు లేవని, బుల్లెట్లు ఉండడం చూసి భయపడి.. ఆ బ్యాగును అక్కడే వదిలేశానని పోలీసులకు చెప్పాడు నిందితుడు.
బుల్లెట్లు ఉన్న బ్యాగును మరో వ్యక్తి తీసుకువెళ్లాడు. ఈ విషయాన్ని గమనించి సదరు వ్యక్తి నుంచి పోలీసులు బుల్లెట్లు స్వాధీనం చేసుకున్నారు. నిందితుడు శ్రీకాకుళం జిల్లాకు చెందిన 21 సంవత్సరాల ఆనంద్ మూర్తిగా గుర్తించారు. అతడిని అరెస్ట్ చేశారు. ఈ కేసును చేధించిన పోలీసులను తెలంగాణ డీజీపీ అంజనీకుమార్ అభినందించారు.
