- 12వ తేదీ దాటినా పర్మినెంట్, ఔట్సోర్సింగ్ ఎంప్లాయీస్కు అందని వేతనాలు
హైదరాబాద్, వెలుగు: జీహెచ్ఎంసీలో పర్మినెంట్ ఉద్యోగులతో పాటు ఔట్ సోర్సింగ్ ఉద్యోగులకు వేతనాలు అందలేదు. 12వ తేదీ దాటినా వేతనాలు అందకపోవడంపై ఉద్యోగులు ఆందోళనకు గురవుతున్నారు. ప్రతినెలా ముందుగానే వేస్తున్నప్పటికీ ఈ నెల మాత్రం చాలా ఆలస్యం చేస్తున్నారని.. ఈఎంఐలు, లోన్లు ఉన్న వారికి చెక్ బౌన్స్లు అవుతున్నాయని ఉద్యోగులు చెబుతున్నారు. కొన్ని జోన్లలో ఉద్యోగులు ఒత్తిడి తేవడంతో అక్కడ వారికి జీతాలు వేసినట్లు తెలుస్తోంది.
గ్రేటర్ హైదరాబాద్లో మొత్తం ఆరు జోన్లు ఉండగా కొన్ని జోన్లతో పాటు హెడ్డాఫీసులో పనిచేసే ఉద్యోగులకు వేతనాలు అందలేదు. బల్దియా ఆర్థిక పరిస్థితులు బాగాలేకపోవడంతోనే జీతాలు పడలేదని సమాచారం. గత నెలలో ఎన్నికలు ఉండటంతో ప్రాపర్టీ ట్యాక్స్ కలెక్షన్ ఆదాయం తగ్గడం కూడా ఇందుకు ఓ కారణమైందన్న చర్చ జరుగుతోంది. కాంగ్రెస్ ప్రభుత్వం ఇచ్చిన హామీ మేరకు వచ్చే నెల నుంచి 1న జీతాలు అందే విధంగా సీఎం రేవంత్ రెడ్డి చర్యలు తీసుకోవాలని ఉద్యోగులు, సిబ్బంది కోరుతున్నారు.
