హైదరాబాద్, వెలుగు : ఉగ్రవాదాన్ని పెంచి పోషిస్తూ.. బలవంతపు మత మార్పిళ్లకు పాల్పడుతున్న తబ్లిగీ జమాత్ సంస్థకు రాష్ట్ర ప్రభుత్వం నుంచి నిధులు ఎలా విడుదుల చేస్తారని కరీంనగర్ ఎంపీ, బీజేపీ జాతీయ ప్రధాన కార్యదర్శి బండి సంజయ్.. సీఎం రేవంత్ రెడ్డిపై ఫైర్ అయ్యారు. వికారాబాద్ జిల్లా పరిగి మండలంలో వచ్చే నెల 6 నుంచి 8 వ తేదీ వరకు ఇస్లామిక్ సమాజం పేరిట తబ్లిగీ జమాత్ సంస్థ ఏర్పాటు చేసిన సమావేశం కోసం రాష్ట్ర సర్కార్ రూ.2 కోట్ల 45 లక్షలకుపైగా నిధులు మంజూరు చేయడం దారుణమని మండిపడ్డారు. ఈ మేరకు బుధవారం హైదరాబాద్ లో బండి సంజయ్ మీడియాకు ఒక ప్రకటన విడుదల చేశారు. రాష్ట్రం దివాళా తీసిందని.. వడ్డీలు కట్టడానికే ఖజానా సరిపోవడం లేదని చెబుతున్న కాంగ్రెస్ ప్రభుత్వం.. ఈ కార్యక్రమానికి నిధులివ్వడమేంటని ప్రశ్నించారు. తుక్టే తుక్డే గ్యాంగ్ తో సీఎం రేవంత్ రెడ్డి రాష్ట్రాన్ని ఏం చేయాలనుకుంటున్నారని ప్రశ్నించారు.
