- రాష్ట్రంలో బీజేపీ మద్దతిస్తూ.. కేంద్రంలో అడ్డుకుంటున్నది: నారాయణ
- బీసీ జేఏసీ బంద్కు మద్దతుగా వామపక్షాల భారీ ర్యాలీ
హైదరాబాద్, వెలుగు: బీసీలకు 42 శాతం రిజర్వేషన్ల బిల్లును కేంద్ర ప్రభుత్వం పార్లమెంటులో ఆమోదించి 9వ షెడ్యూల్లో చేర్చాలని వామపక్ష పార్టీలు, ప్రజాసంఘాలు, టీజేఎస్ ప్రెసిడెంట్ కోదండరాం డిమాండ్ చేశారు. బీసీ రిజర్వేషన్ల అమలు చేయాలని కోరుతూ తలపెట్టిన బంద్కు మద్దతుగా శనివారం వామపక్షాల నేతలు భారీ ర్యాలీ నిర్వహించారు. ప్రజలు స్వచ్ఛందంగా బంద్లో పాల్గొనాలని వామపక్ష పార్టీలు, ప్రజా సంఘాలు, టీజేఎస్ ప్రెసిడెంట్ కోదండరాం తదితరులు నారాయణగూడ వైఎంసీఏ నుంచి కాచిగూడ చౌరస్తా, కోఠి, సుల్తాన్ బజార్, రామకోఠి, బొగ్గులకుంట మీదుగా అబిడ్స్ చౌరస్తా చేరుకుని అక్కడ సభ నిర్వహించారు. ఈ సందర్భంగా సీపీఐ రాష్ట్ర కార్యదర్శి కూనంనేని సాంబశివరావు, సీపీఎం రాష్ట్ర కార్యదర్శి జాన్ వెస్లీ మాట్లాడుతూ ‘‘రాష్ట్ర ప్రభుత్వం ఆర్డినెన్స్‌, బిల్లు తీసుకొచ్చింది.
అసెంబ్లీలో బీసీలకు అన్యాయం జరిగితే సహించబోమని బీజేపీ ఎమ్మెల్యేలు అంటున్నారు. ఈ బిల్లును ఆపింది ఎవరో ఇప్పుడు రోడ్డు మీదికి వస్తున్న బీజేపీ నేతలు చెప్పాలి” డిమాండ్ చేశారు. సీపీఐ నేత నారాయణ మాట్లాడుతూ, బీజేపీ ద్వంద్వ వైఖరి అవలంబిస్తుందని, ఆ పార్టీ ఇక్కడ బీసీ రిజర్వేషన్లకు మద్దతిస్తూనే కేంద్రంలో ఆపుతున్నదని మండిపడ్డారు. కావాలనే బీసీ బిల్లును బీజేపీ పెండింగ్‌‌‌‌లో పెట్టిందని, మోదీ నిజమైన బీసీనో కాదో తెలియడానికి నార్కో టెస్ట్ పెట్టాలన్నారు. ఈ కార్యక్రమంలో అరుణోదయ సాంస్కృతి సమాఖ్య రెండు రాష్ట్రాల గౌరవ అధ్యక్షురాలు విమలక్క, సీపీఐ(ఎంఎల్) న్యూ డెమోక్రసీ నాయకులు గోవర్ధన్, టీజేఎస్నేత ప్రొ.విశ్వేశ్వరరావు, సీపీఐ(ఎంఎల్) మాస్ లైన్ హన్మేశ్, ఎంసీపీయూఐ నాయకులు గదేగోని రవి పాల్గొన్నారు.
