- తెలంగాణ మినహా.. ఇయ్యాల్టి నుంచి 3 రాష్ట్రాల్లో ప్రారంభం
హైదరాబాద్‌, వెలుగు: తెలంగాణ మినహా ఆంధ్రప్రదేశ్, కర్నాటక, కేరళ రాష్ట్రాల్లో యాసంగి సీజన్ వడ్ల సేకరణ శుక్రవారం నుంచి మొదలుకానుంది. పొరుగు రాష్ట్రాల్లో వడ్లు కొనుడు షురూ అవుతుంటే మన రాష్ట్రంలో మాత్రం ఇప్పటి వరకు నిర్ణయమే తీసుకోలేదు. దీంతో రాష్ట్ర రైతులు పరేషాన్లో ఉన్నరు. గురువారం రాష్ట్రాలవారీగా యాసంగి ధాన్యం సేకరణపై కేంద్ర ఆహార, ప్రజాపంపిణీ , వినియోగదారుల మంత్రిత్వశాఖ ఉత్వర్వులిచ్చింది. దీంతో ఏపీ, కేరళ, కర్నాటక రాష్ట్రాల్లో ఏప్రిల్1 నుంచి వడ్లు సేకరించాలని నిర్ణయించారు. ఏపీలో ఆగస్టు 30 నాటికి , కేరళలో జులై 15 నాటికి, కర్నాటకలో మే 31 నాటికి సేకరణ పూర్తిచేయాలని కేంద్రం ఆదేశించింది. ఒడిశా, బెంగాల్లో మే నెల ప్రారంభం నుంచి జూన్ 30 నాటికి పూర్తిచేయాలని, అసోంలో జులై 1, త్రిపురలో జూన్1 నుంచి వడ్ల సేకరణ షురూ చేసి సెప్టెంబరు 30 నాటికి పూర్తిచేయాలని టార్గెట్ పెట్టింది. కాగా ఈ 7 రాష్ట్రాల్లో కస్టమ్ మిల్లింగ్ రైస్‌ సెప్టెంబరు నెల 30 నాటికి పూర్తిచేసి ఎఫ్‌‌‌‌సీఐకి బియ్యం సరఫరా చేయాలని కేంద్రం ఆదేశించింది.
