1947 నాటి ప్రేమ కథ
టైటిల్: జూబిలి, కాస్ట్: అపర్శక్తి ఖురానా, ప్రసేన్జిత్ ఛటర్జీ, అదితీ రావ్ హైదరి, వామికా గబ్బి, సిధాంత్, రామ్ కపూర్, నందీష్ సింగ్ సంధు, శ్వేతా బసు ప్రసాద్, లాంగ్వేజ్: హిందీ, ఫ్లాట్ఫాం: అమెజాన్ ప్రైమ్ వీడియో, డైరెక్షన్: విక్రమాదిత్య మోత్వానే
శ్రీకాంత్ రాయ్ (ప్రసేన్జిత్ ఛటర్జీ) ‘రాయ్ టాకీస్’ అనే ప్రొడక్షన్ హౌజ్ నడుపుతుంటాడు. ఒక వ్యక్తికి మదన్కుమార్ అనే పేరు పెట్టి, సూపర్ స్టార్ని చేయాలి అనుకుంటాడు శ్రీకాంత్. అందుకు తగ్గ వ్యక్తి కోసం చాలా రోజులు వెతుకుతారు. చివరికి ఆడిషన్స్లో మదన్కుమార్ పాత్ర కోసం జంషెడ్ ఖాన్ (నందీష్ సింగ్ సంధు)ని ఎంపిక చేస్తారు. అయితే.. అనుకోకుండా జంషెడ్తో శ్రీకాంత్ రాయ్ భార్య సుమిత్రా కుమారి (అదితి రావు హైదరి) లేచిపోతుంది. వాళ్ల కోసం శ్రీకాంత్ వెతకడం మొదలుపెడతాడు. చివరికి వాళ్లు లక్నోలో ఉన్నారని తెలిసి, వాళ్లని ముంబైకి తీసుకొచ్చే పనిని బినోద్ దాస్ (అపర్ శక్తి ఖురానా)కు అప్పగిస్తాడు. కానీ.. సుమిత్రాని మాత్రమే తీసుకొస్తాడు బినోద్. తర్వాత అతనే మదన్కుమార్గా సినిమాలో నటిస్తాడు. మరయితే జంషెడ్ ఏమయ్యాడు? మదన్కుమార్గా బినోద్ని ఎందుకు సెలక్ట్ చేశారు? అనేది సిరీస్ చూసి తెలుసుకోవాల్సిందే.
ఈ కథలో వీళ్లతో పాటు దేశ విభజన అప్పుడు కరాచీ నుంచి ఇండియాకు శరణార్థిగా వచ్చిన జై ఖన్నా (సిధాంత్ గుప్తా), నిలోఫర్ ఖురేషి (వామికా గబ్బి), బినోద్ భార్యరత్న(శ్వేత బసుప్రసాద్) పాత్రలకు కూడా ఇంపార్టెన్స్ ఉంది. అందరూ బాగా నటించారు. ముఖ్యంగా బినోద్ పాత్రలో అపర్శక్తి ఖురానా మెప్పించాడు.
పిపిల్లాడి ప్రేమ
టైటిల్: చుపా, కాస్ట్: ఇవన్ విట్టెన్, నికోలస్ వెర్డుగో, యాష్లే సియార్రా, డెమియాన్ బిచిర్, క్రిస్టియన్ స్లేటర్
లాంగ్వేజ్: ఇంగ్లిష్, ఫ్లాట్ఫాం: నెట్ఫ్లిక్స్, రన్ టైం: 98 నిమిషాలు, డైరెక్షన్: జోనస్ క్యూరోన్
అలెక్స్ (ఇవన్ విట్టెన్) వాళ్ల నాన్న చనిపోతాడు. దాంతో అతను బాగా బాధపడుతుంటాడు. కొన్ని రోజులు వేరే ప్లేస్లో ఉండడం బెటర్ అనుకుంటాడు. మెక్సికోలో ఉన్న తాత దగ్గరికి వెళ్తాడు. అక్కడికి వెళ్లాక చాలా సంతోషంగా అనిపిస్తుంది. ఆ సంతోషానికి కారణం.. తాత చావా (డెమియాన్ బిచిర్), కజిన్స్ మెమో (నికోలస్ వెర్డుగో), ల్యూనా (యాష్లే సియార్రా), చుపా అని పిలుచుకునే ఒక అందమైన వింత జీవి. అలెక్స్కు వాళ్లంతా దగ్గరవుతారు. చుపా మీద చాలా ఇష్టం పెంచుకుంటాడు. దాన్ని తన ఫ్యామిలీతో కలపాలి అనుకుంటాడు. అందుకు అలెక్స్ ఏం చేశాడనేది తెలియాలంటే ఈ సినిమా చూడాల్సిందే.
అనామిక ఎవరు?
టైటిల్: రోమాంచమ్, కాస్ట్: సౌబిన్ షాహిర్, అనంతరామన్, సాజిన్ గోపు, అబిన్ బినో, సిజు సన్నీ, అఫ్జల్ పీహెచ్, జగదీష్, అర్జున్ అశోకన్, లాంగ్వేజ్: మలయాళం, తెలుగు, ఫ్లాట్ఫాం: డిస్నీ+ హాట్స్టార్ , రన్ టైం: 132 నిమిషాలు, డైరెక్షన్: జీతు మాధవన్.
జీవన్ (సౌబిన్ షాహిర్) హాస్పిటల్ బెడ్ మీద ఉంటాడు. స్పృహలోకి రాగానే తన ఫ్రెండ్స్ని చూడాలని ఉంది అంటాడు. రెండు రోజుల తర్వాత మరో రూమ్కి షిఫ్ట్ చేస్తారు. అప్పుడు కలవచ్చు అంటారు అక్కడి వాళ్లు. జీవన్ నర్సుతో తన ఫ్లాష్ బ్యాక్ చెప్పడం మొదలుపెడతాడు. బెంగళూరు సిటీ శివార్లలో ఉన్న ఒక ఇంట్లో జీవన్ తన ఫ్రెండ్స్ రవి (అనంతరామన్ అజయ్), నీరజ్ (సజిన్ గోపు), ముఖేష్ (సిజు సన్నీ), కార్తీక్ (అఫ్జల్ పీహెచ్), సోమరాజు (జగదీష్), శివాజీ (అబిన్ బినో)తో కలసి ఉంటాడు. వాళ్లంతా మంచి ఫ్రెండ్స్. బ్యాచిలర్స్ కావడంతో ఒకే ఇంట్లో అద్దెకు ఉంటారు. ఒక్కొక్కరు ఒక్కో పని చేస్తుంటారు. జీవన్ ఒకరోజు తన ఫ్రెండ్స్ రూమ్లో ఓజా(ఆత్మలను రప్పించే స్పిరిట్ బోర్డ్) ఆడడం చూసి, తన రూమ్లో కూడా ఆడతాడు. ఆ బోర్డ్తో జీవన్ ఒక ఆత్మను రప్పిస్తాడు. రోజూ రాత్రి దాంతో టైంపాస్ చేస్తుంటారు. కొన్ని రోజులకు రూమ్లో విచిత్రమైన ఇన్సిడెంట్స్ జరుగుతుంటాయి. దాంతో గేమ్ ఆడడం ఆపేస్తారు. అప్పుడే ఆ రూమ్లోకి జీవన్ ఫ్రెండ్ శ్రీను(అర్జుణ్ అశోకన్) వస్తాడు. ఆ తర్వాత ఏం జరిగింది? ఆ ఆత్మ ఎవరిది? జీవన్ హాస్పిటల్లో ఎందుకున్నాడు? తెలుసుకోవాలంటే ఈ సినిమా చూడాలి.
రోమాంచమ్ సినిమా చూస్తే గూస్ బంప్స్ వస్తాయి. 2007లో బెంగళూర్ సిటీలో ఉంటున్న ఏడుగురు ఫ్రెండ్స్ లైఫ్లో ఎదురైన వాస్తవ సంఘటనల ఆధారంగా ఈ సినిమా తీశారు. అందరూ బాగా చేశారు. సినిమా బోర్ అనిపిస్తుంది అనుకున్న ప్రతిసారి ఒక సర్ప్రైజ్ ట్విస్ట్ ఇచ్చాడు డైరెక్టర్. ఆత్మను అడిగే ప్రశ్నలు కొన్ని కామెడీగా ఉంటాయి. ఒక పక్క నవ్విస్తూ మరో పక్క భయపెడుతుంది కూడా.