హైదరాబాద్, వెలుగు : జీహెచ్ఎంసీ కౌన్సిల్ సమావేశం నిర్వహించాలని బీజేపీ, బీఆర్ఎస్ కార్పొరేటర్లు డిమాండ్ చేశారు. ఈ మేరకు మున్సిపల్ అడ్మినిస్ట్రేషన్ అండ్ అర్బన్ డెవలప్ మెంట్ ప్రిన్సిపల్ సెక్రటరీ దానకిశోర్, బల్దియా కమిషనర్ రోనాల్డ్ రాస్కు శుక్రవారం వినతిపత్రం అందజేశారు. ఈ సందర్భంగా జీహెచ్ఎంసీ ఆఫీసు వద్ద బీజేపీ ఫ్లోర్ లీడర్ కొప్పుల నర్సింహా రెడ్డి మాట్లాడుతూ..
కౌన్సిల్ సమావేశం 3 నెలలకోసారి ఏర్పాటు చేయాల్సి ఉన్నప్పటికీ జరగట్లేదన్నారు. మేయర్ సైతం ఈ విషయాన్ని పట్టించుకోవట్లేదన్నారు. రాష్ట్ర ప్రభుత్వం బల్దియాను ఆదుకోవాలని కోరారు. కౌన్సిల్ మీటింగ్ నిర్వహించాలని హైకోర్టుని సైతం ఆశ్రయించామన్నారు. వినతిపత్రం ఇచ్చిన వారిలో మల్కాజిగిరి కార్పొరేటర్ శ్రవణ్, సరూర్నగర్ కార్పొరేటర్ ఆకుల శ్రీవాణి ఉన్నారు.
కౌన్సిల్ సమావేశం నిర్వహించాలని మేయర్కు ఇంట్రెస్ట్ ఉన్నప్పటికీ కమిషనర్ వల్లే ఆలస్యం అవుతోందని బీఆర్ఎస్ కార్పొరేటర్లు ఆరోపించారు. కౌన్సిల్ ఏర్పాటు చేయాలని బీఆర్ఎస్ పార్టీ తరపున వినతిపత్రం ఇచ్చామన్నారు. ఒకే అంశం కావడం వల్లే బీజేపీతో కలిసి మాట్లాడామన్నారు.
