దిగ్విజయ్ సింగ్ తో పాటు వేదిక పంచుకున్న యువకుడిని బీజేపీ బుధవారం సన్మానించింది. రెండు రోజుల క్రితం భోపాల్ లోక్ సభ అభ్యర్థి దిగ్విజయ్ సింగ్ భోపాల్ లో ఎన్నికల ర్యాలీ నిర్వహించారు. ర్యాలీలో భాగంగా ఓ సభలో పాల్లోన్న దిగ్విజయ్.. ప్రధాని మోదీపై విమర్శలు గుప్పించారు. ప్రధానిగా మోడీ దేశానికి ఏం చేశారని సభలో ప్రజలనుద్దేశించి ప్రశ్నించాడు.
ఈ క్రమంలో దిగ్విజయ్ పిలవడంతో జనంలో ఉన్న అమిత్ మాలి అనే వ్యక్తి వేదికపైకి వచ్చి మోదీ సర్జికల్ దాడులు నిర్వహించి ఉగ్రవాదులను మట్టుబెట్టారని చెప్పాడు. ఈ మాటలతో ఖంగు తిన్న కాంగ్రెస్ కార్యకర్తలు అమిత్‌ను వెంటనే వేదికపై నుంచి కిందకు దించేశారు.
ఈ వీడియో సోషల్ మీడియాలో వైరల్ అయింది. వీడియోను చూసిన బీజేపీ నేతలు, అమిత్‌పై ప్రశంసలు కురిపించడమే కాకుండా అతన్ని తమ పార్టీ కార్యాలయానికి రప్పించి మరీ సన్మానించింది.
ఈ సందర్భంగా అమిత్ మీడియాతో మాట్లాడుతూ, కాంగ్రెస్ సభలో భాగంగా దిగ్విజయ్, ఎవరికైనా తమ అకౌంట్లలో రూ.15 లక్షలు జమ అయ్యాయా? అని ప్రశ్నించినపుడు తాను చెయ్యి పైకెత్తానని, దీంతో తనను వేదిక పైకి పిలిచారన్నారు. ఆ సమయంలోనే తాను సర్జికల్ దాడుల గురించి మాట్లాడటంతో తనను స్టేజిపై నుంచి కిందకు పంపేశారన్నారు. అయినప్పటికీ అక్కడున్న వారు ఎవరూ కూడా తనతో అనుచితంగా ప్రవర్తించలేదని అమిత్ తెలిపారు.
