హైదరాబాద్, వెలుగు: రిజర్వేషన్లపై రాహుల్ గాంధీ, రేవంత్ రెడ్డి అబద్ధాలు మాట్లాడుతున్నారని బీజేపీ ఓబీసీ మోర్చా జాతీయ అధ్యక్షుడు, ఎంపీ లక్ష్మణ్ అన్నారు. రేవంత్ రెడ్డికి చిత్తశుద్ధి ఉంటే రిజర్వేషన్లపై చర్చించేందుకు భాగ్యలక్ష్మి టెంపుల్దగ్గరికి రావాలని ఆయన సవాల్ విసిరారు. అంబేద్కర్ ఆశయాలను నీరుగార్చింది కాంగ్రెస్ పార్టీయేనని ఆయన ఆరోపించారు. సోమవారం బీజేపీ స్టేట్ ఆఫీసులో మీడియా ఇన్ చార్జ్ ఎన్వీ సుభాష్ తో కలిసి లక్ష్మణ్ మీడియాతో మాట్లాడారు. కులాల ఆధారంగా రిజర్వేషన్లు వద్దని 1961లోనే నెహ్రూ అప్పటి సీఎంలకు లేఖలు రాశారని గుర్తుచేశారు.
రాజీవ్ గాంధీ పార్లమెంట్ లో బీసీలకు 27% రిజర్వేషన్లు వ్యతిరేకించింది వాస్తవం కాదా? అని ఆయన ప్రశ్నించారు. దీనిపై భాగ్యలక్ష్మి అమ్మవారి దగ్గరికి వచ్చి ప్రమాణం చేసి చెప్పాలని డిమాండ్ చేశారు. దేశంలో రెండు సిద్ధాంతాల మధ్య పోటీ జరుగుతోందన్నారు. జూన్ 4 తర్వాత కాంగ్రెస్కు పరాభవం తప్పదని, మిగిలేదీ గాడిద గుడ్డేనని చెప్పారు. ఈ ఎన్నికలు చాయ్ వాలా మోదీకి.. అగర్భ శ్రీమంతుడు రాహుల్ గాంధీకి మధ్య జరుగుతున్న పోటీ అని, దేశాభివృద్ధికి.. కుటుంబ రాజకీయాలకు మధ్య జరుగుతున్న పోటీ అని అభివర్ణించారు.
కాంగ్రెస్ నేతలు ఆర్ఆర్ ట్యాక్స్ పేరుతో జలగల్లా పీడిస్తున్నారని ఆరోపించారు. మతపరమైన రిజర్వేషన్లు రాజ్యాంగ విరుద్ధమని, రేవంత్ రెడ్డి హిందువుల మనోభావాలు కించపర్చే విధంగా దిగజారి మాట్లాడుతున్నారని విమర్శించారు. హిందూ దేవుళ్లు, రాముడు అంటే ఎందుకంత కోపం అని లక్ష్మణ్ ప్రశ్నించారు. సీఎం రేవంత్ రెడ్డి తనకు కావాల్సిన వారితో పబ్లిక్ సర్వీస్ కమిషన్ నింపుకొని, నిరుద్యోగులకు గాడిద గుడ్డు చూపించారని ఆయన ఎద్దేవా చేశారు.
