రియల్ దందా కోసమే ‘మహానగరం’ : రాంచందర్ రావు

• గ్రేటర్ హైదరాబాద్ ముంచేందుకే విలీన నాటకం: రాంచందర్ రావు

హైదరాబాద్, వెలుగు: మహానగరం పేరు చెప్పి కాంగ్రెస్ సర్కార్ మళ్లీ జనం నడ్డి విరిచేందుకు రెడీ అయ్యిందని, గ్రేటర్ హైదరాబాద్‌‌‌‌‌‌‌‌ను మరింత పెంచి.. పరిపాలనను ఆగమాగం చేసే కుట్ర చేస్తున్నదని బీజేపీ రాష్ట్ర అధ్యక్షుడు ఎన్.రాంచందర్​రావు అన్నారు. ఇప్పటికే ఉన్నోళ్లకు నీళ్లు, రోడ్లు ఇయ్యలేకపోతున్నారని, ఇంకా కొత్తగా 20 మున్సిపాలిటీలు, 7 కార్పొరేషన్లను కలిపి ఏం ఉద్ధరిస్తరని ప్రశ్నించారు. 

ఇది ప్రజల కోసం చేస్తున్నది కాదని.. కేవలం రియల్ ఎస్టేట్ మాఫియా కోసమేనని ఆగ్రహం వ్యక్తం చేశారు. బీజేపీ స్టేట్ ఆఫీసులో శుక్రవారం ఆయన మీడియాతో మాట్లాడారు. గ్రేటర్ చుట్టుపక్కల ఉన్న మున్సిపాలిటీలను జీహెచ్ంఎసీలో కలిపే నిర్ణయాన్ని తీవ్రంగా వ్యతిరేకిస్తున్నామని స్పష్టం చేశారు. 

పరిపాలన ప్రజలకు దగ్గరగా ఉండాలి గానీ.. ఇలా సెంట్రలైజేషన్ చేస్తే తిప్పలే మిగులుతాయని చెప్పారు. గతంలో ఎంసీహెచ్​ను జీహెచ్ంఎసీ చేసినప్పుడే దిక్కుమొక్కూ లేదన్నారు. బంజారాహిల్స్ లో ఉన్నోడికి తక్కువ ట్యాక్స్.. మల్కాజిగిరిలో ఉన్నోడికి ఎక్కువ ట్యాక్స్ బాదారని ఆరోపించారు. ఇప్పుడు మళ్లీ పల్లెలను, మున్సిపాలిటీలను గ్రేటర్‌‌‌‌‌‌‌‌లో కలిపి పన్నుల మోత మోగించేందుకు స్కెచ్ వేశారని ఆగ్రహం వ్యక్తం చేశారు. 

రేవంత్ రెడ్డి సర్కార్ కు రియల్ ఎస్టేట్ మీద ఉన్న ప్రేమ.. జనాల మీద లేదన్నారు. మొన్న హైడ్రా అని భయపెట్టారని.. నిన్న ‘హిల్ట్’అని 9 వేల ఎకరాలు రియల్ మాఫియాకు కట్టబెట్టే ప్లాన్ చేశారని, తాజాగా ఇప్పుడు ‘మహానగరం’ అని ఇంకో దందాకు తెరలేపారని ఆరోపించారు. సమావేశంలో ఎమ్మెల్సీలు మల్క కొమరయ్య, అంజిరెడ్డి, బీజేపీ నేతలు ఎన్​వీఎస్ఎస్​ ప్రభాకర్, బండ కార్తీక రెడ్డి, ఎన్వీ సుభాశ్, శంకర్ యాదవ్ తదితరులు పాల్గొన్నారు.