- మంత్రి ఉత్తమ్ కు బీజేఎల్పీ నేత ఏలేటి సవాల్
హైదరాబాద్, వెలుగు: హిల్ట్ పాల‌సీ అత్యంత పారదర్శకంగా ఉందని, ఎలాంటి కుంభకోణానికి ఆస్కారం లేదంటున్న మంత్రి ఉత్తమ్ కుమార్ రెడ్డి.. ఈ విధానంపై బ‌హిరంగ చర్చకు సిద్దమా అంటూ బీజేఎల్పీ నేత ఏలేటి మహేశ్వర్ రెడ్డి సవాల్ విసిరారు. ఓపెన్ డిబెట్కు సిద్ధపడితే.. శనివారం ఉదయం 11గంటలకు అసెంబ్లీ మీడియా పాయింట్లో జర్నలిస్టుల సమక్షంలో చర్చకు తాను సిద్ధమని ప్రకటించారు.
లేదంటే డేట్, టైమ్, వేదిక మంత్రి చెప్పినా.. తనకు అభ్యంతరం లేదని, ఎక్కడైనా, ఎప్పుడైనా చర్చకు సిద్దమేనని శుక్రవారం ఒక ప్రకటనలో స్పష్టం చేశారు. పరిశ్రమలను సిటీ బయటకు పంపుతున్నామని చెబుతున్న సర్కార్.. ప్రత్యామ్నాయంగా ఎక్కడ భూములు ఇచ్చారో ఎందుకు చెప్పడం లేదని నిలదీశారు. రాష్ట్రాన్ని ల్యాండ్ మాఫియా ఏలుతోందని, సీఎం రేవంత్ రెడ్డి ల్యాండ్ లూటీ మాఫియాకు డాన్‌లా, మంత్రులు గ్యాంగ్‌స్టర్లలా వ్యవహరిస్తున్నారని విమర్శించారు.
