ఎంత ఇష్టమున్నా ఒకటి రెండుకి మించి తినలేం బర్గర్స్. కానీ, ఈ ఫొటోలో కనిపిస్తున్న అమెరికా అబ్బాయి మ్యాట్ స్టోనీ మాత్రం 20,000 క్యాలరీలున్న బర్గర్ తిన్నాడు. అది కూడా నాలుగు నిమిషాల పది సెకన్లలో 3 కిలోల బరువున్న బర్గర్ను తింటున్న ఆ వీడియోని రీసెంట్గా ఓ యూట్యూబ్ ఛానెల్లో పోస్ట్ చేశాడు. ఒకటి కాదు రెండు కాదు ఏకంగా 15 మిలియన్ వ్యూస్ వచ్చాయి ఆ వీడియోకి. అయితే ఇలా అందరూ ఆశ్చర్యపోయేలా తినడం మ్యాట్కి కొత్తేం కాదు. ఎందుకంటే మ్యాట్ అమెరికాలో పాపులర్ ఫుడ్ కాంపిటీటర్స్లో ఒకడు.
ఇంతకుముందు కూడా ఫుడ్ కాంపిటీషన్స్లో ఎన్నో రికార్డ్స్ బద్దలుకొట్టాడు ఇతను. ఇప్పుడు తాజాగా లాస్ వెగాస్లోని ‘హార్ట్ ఎటాక్ గ్రిల్ హమ్ బర్గ్ రెస్టారెంట్’ ఏర్పాటు చేసిన ‘ఆక్టోపల్ బైపాస్’ ఛాలెంజ్లో పార్టిసిపేట్ చేశాడు. ఈ ఛాలెంజ్ గెలవడం అంత ఆషామాషీ కాదు. పొరలు పొరలుగా ఉండే ఈ బర్గర్లో 20, 000 కేలరీలు ఉంటాయి. 40 బేకన్ స్ట్రిప్స్, 16 స్లైస్లు వాటి మధ్యలో ఉల్లిగడ్డలు, టొమాటోలు, మిర్చి, బన్స్తో ఉండే ఈ బర్గర్ దాదాపు మూడు కిలోల బరువు ఉంటుంది. దాంతో చాలామంది ఫుడ్డీస్ ఈ బర్గర్ తినలేమంటూ చేతులెత్తేశారు. కానీ, మ్యాట్ స్టోనీ మాత్రం కేవలం 4.10 నిమిషాల్లో ఈ బర్గర్ తిని రికార్డ్ సృష్టించాడు. దాంతో సోషల్ మీడియాలో ఇతని పేరు మార్మోగుతోంది.
