- అక్రమ సంబంధమే కారణం!
స్టేషన్ ఘన్పూర్, వెలుగు: అక్రమ సంబంధానికి అడ్డుగా ఉన్నాడని ప్రియురాలి భర్తను ప్రియుడు, అతడి బావమర్ది కలిసి దారుణంగా హత్య చేశారు. ఈ సంఘటన స్టేషన్ ఘన్పూర్ మండలం నమిలిగొండలో జరిగింది. ఏసీపీ గైక్వాడ్ వైభవ్ వివరాల ప్రకారం.. ఘట్ కేసర్ మండలం వెంకటాపూర్ గ్రామంలో ఆకుల మహేశ్(26), అతడి భార్య అశ్విని(25) నివాసం ఉంటున్నారు. మహేశ్ ఓ పెట్రోల్ బంక్లో పనిచేస్తుండగా.. అశ్విని పూలు అమ్ముకుంటూ జీవనం సాగిస్తోంది. ఈక్రమంలో అశ్విని, స్టేషన్ ఘన్పూర్ మండలం మీదికొండకు చెందిన పసుల కుమార్(31)తో వివాహేతర సంబంధం పెట్టుకుంది. పసుల కుమార్ ఘట్కేసర్ లో ఆటో డ్రైవర్ గా పనిచేస్తున్నాడు. వీరిద్దరికి మహేశ్అడ్డుగా ఉన్నాడనే కారణంతో అతన్ని చంపాలని ప్లాన్ వేసుకున్నారు. పసుల కుమార్, అతని బావమర్ది పాలెపు క్రిష్ణ(28) కలిసి ఈ నెల 5న మహేశ్ను ఓ ప్రైవేట్కారులో క్రిష్ణ స్వస్థలం అయిన స్టేషన్ ఘన్పూర్ మండలం నమిలిగొండకు తీసుకెళ్లారు. అక్కడ మహేశ్కు ఫుల్లుగా మద్యం తాగించారు. మహేశ్ తలపై ఇరువురు బండరాళ్లతో కొట్టి హత్య చేశారు. మృతదేహాన్ని సంచిలో పెట్టి, ఓ బావిలో పడేశారు. ఈ నెల 8న భార్య అశ్విని తన భర్త కనిపించడం లేదంటూ పోలీసులకు ఫిర్యాదు చేసింది. దీంతో మిస్సింగ్ కేసు నమోదు చేసిన పోలీసులు.. మహేశ్ కాల్డేటా ఆధారంగా పసుల కుమార్ను పట్టుకున్నారు. అతన్ని విచారించగా.. తానే నేరం చేసినట్లు ఒప్పుకున్నాడు. కుమార్తో పాటు అతని బావమర్ది క్రిష్ణను పోలీసులు అదుపులోకి తీసుకున్నారు. వారి ఇచ్చిన సమాచారం మేరకు బావిలో డెడ్బాడీని వెలికి తీశారు. కార్యక్రమంలో డీసీపీ శ్రీనివాస్రెడ్డి, జనగామ ఏసీపీ వినోద్కుమార్, సీఐ ఎడవెల్లి శ్రీనివాస్రెడ్డి, ఎస్సై రమేశ్నాయక్ ఉన్నారు.