మూసీ నిర్వాసితులకు గచ్చిబౌలిలో ఇండ్లు కట్టివ్వాలి : హరీశ్ రావు

మల్లన్నసాగర్, కొండపోచమ్మ సాగర్ నిర్వాసితులకు న్యాయం చేసినం: హరీశ్ రావు

గజ్వేల్/మానకొండూర్ (తిమ్మాపూర్), వెలుగు: మూసీ నిర్వాసితులందరికీ గచ్చిబౌలిలో 250 గజాల విస్తీర్ణంలో డబుల్ బెడ్రూం ఇండ్లు కట్టించి ఇవ్వాలని ప్రభుత్వాన్ని బీఆర్ఎస్ ఎమ్మెల్యే హరీశ్రావు డిమాండ్ చేశారు. మల్లన్నసాగర్, కొండపోచమ్మ సాగర్ నిర్వాసితులకు తాము అన్ని విధాలుగా న్యాయం చేశామని చెప్పారు.

వారికి దేశంలోనే నంబర్ వన్ఆర్ అండ్ ఆర్ కాలనీని 675 ఎకరాల్లో నిర్మించామని తెలిపారు. నిర్వాసితులపై కాంగ్రెస్ నాయకులు ఈ మధ్య కపటప్రేమ ఒలకబోస్తున్నారని అన్నారు. ఆదివారం సిద్దిపేట జిల్లా గజ్వేల్ పట్టణంలోని ఎమ్మెల్యే క్యాంప్ కార్యాలయంలో హరీశ్రావు మీడియాతో మాట్లాడారు.

తమ సర్కారు మల్లన్నసాగర్ , కొండపోచమ్మ సాగర్ బాధితులకు పాత ఇండ్లకు రూ.694 కోట్లు కేటాయించిందని చెప్పారు. ఇంటి యజమానికి ఉపాధి కింద 7 లక్షల 50 వేలు ఇచ్చామని, ఇంట్లో పెళ్లికాని మగ, ఆడ పిల్లలకు రూ.5 లక్షలు ఇచ్చామన్నారు. అందరికీ డబుల్ బెడ్ రూం ఇండ్లు కట్టించి ఇచ్చామని తెలిపారు.

పెండ్లికాని పిల్లలకు 250 గజాల ఖాళీ స్థలం కూడా ఇచ్చినట్టు చెప్పారు. గజ్వేల్పట్టణ నడిబొడ్డునే డబుల్ బెడ్రూం ఇండ్లు ఇచ్చినట్టు తెలిపారు. సీఎం రేవంత్ మాత్రం మూసీలో ఇండ్లు కూల్చి, నిర్వాసితులకు కేసీఆర్ కట్టించిన డబుల్ బెడ్ రూం ఇండ్లనే ఇస్తున్నాడన్నారు.

మల్లన్నసాగర్ నిర్వాసితులకు డబుల్ బెడ్ రూం ఇండ్లు ఇవ్వలేదని రేవంత్రెడ్డి అబద్ధాలు ఆడుతున్నారని, తాము గజ్వేల్లో మొత్తం 3,414 ఇండ్లు నిర్మించి ఇచ్చామని చెప్పారు. 8 వేల మందికి 250 గజాల ఇంటి స్థలాలు ఇచ్చి, నిర్మాణానికి 5 లక్షలు అందజేసినట్టు చెప్పారు. మల్లన్నసాగర్ నిర్వాసితులలో మిగిలిన వారికి నష్ట పరిహారం ఇవ్వాలని రాష్ట్ర సర్కారును హరీశ్రావు డిమాండ్ చేశారు.

సర్కారు తప్పులను ఎత్తిచూపడమే మా బాధ్యత

ప్రభుత్వం తప్పులను ఎత్తి చూపడమే ప్రతిపక్షం బాధ్యత అని, ఆ పనే కేసీఆర్ చేస్తున్నారని -హరీశ్రావు అన్నారు. ప్రజలను మోసం చేసిన కాంగ్రెస్ మీద పోరాటానికి మళ్లీ ధూంధాం మొదలుపెట్టే రోజులు వచ్చాయని తెలిపారు. కరీంనగర్‌‌‌‌ జిల్లా తిమ్మాపూర్ మండలంలోని కొత్తపల్లిలో ఆదివారం మానకొండూర్ నియోజకవర్గస్థాయి బీఆర్ఎస్ పార్టీ కుటుంబ ఆత్మీయ సమ్మేళనం- ‘అలయ్ బలయ్’ కార్యక్రమంలో హరీశ్ మాట్లాడారు.

కరోనా సమయంలోనూ కేసీఆర్ రైతు బంధు ఆపలేదని, మంత్రులు, ఎమ్మెల్యేల జీతాలు ఆపి పెట్టుబడి సాయం ఇచ్చారని గుర్తుచేశారు. కానీ రేవంత్ సర్కారు రైతు బంధును బంద్ పెట్టిందని అన్నారు. ఆయన ఎనుముల రేవంత్రెడ్డి కాదని.. ఎగవేతల రేవంత్రెడ్డి అని కామెంట్ చేశారు. ఆగస్టు 15 నాటికి రుణమాఫీ పూర్తి చేస్తా అని దేవుళ్ల మీద ఒట్లు వేసి మాట తప్పిన ఏకైక సీఎం రేవంత్ అని విమర్శించారు.